Goa-a Congress party MLA-te thutkhawm kohvah thenkhat an tel lo va, a tel lo zinga thenkhat hian rorel lai, BJP an âwn nia sawi zui a ni a; mahse, party lam chuan chutiang a nih loh thu an sawi ve thung.
Congress chuan party chhunga khi a awm lo niin an insawi a, Goa unit chief Amit Patkar chuan thuthang chu chawlhkar hnih awh tur budget session tan dawnah BJP-in an thehdarh mai mai a nih thu a sawi tih news agency PTI chuan a tar lang.
“Thutkhawmah MLA pasarih an tel a. Thuneitu sangin an koh a ni lo va, thutkhawm satliah a ni,” tiin Congress MLA Aleixo Sequeira chuan news agency ANI a hrilh.
Inrinnia thutkhawm kohvah hian kum tira inthlana chief minister atana an vawrh chhuah, Digambar Kamat-a pawh a tel lo nia sawi a ni.
Chief minister hlui, Kamat-a hi inthlan zawhah party-in opposition leader atana amah ruat lova Michael Lobo-a an ruat daih avangin a lungawi lo nia sawi a awm a; mahse, party chuan an pha nasa hle.
Sawi dan thenkhatah chuan inthlan hma lawka BJP atanga Congress-a lut, Lobo-a ngei pawh hian a kalsan tak party hi a âwn nia tar lan a ni.
Hetih lai hian Goa Assembly Speaker Ramesh Tawadkar chuan Pathianni khan Thawhlehnia deputy speaker thlan tura ruahman chu thulh a nih thu hriattirna a chhuah.
Member 40 awmna Goa assembly-ah hian rorel lai, BJP kaihhruai National Democratic Alliance (NDA) chuan MLA 25 neiin Congress-in 11 an nei.
Congress hi kum 2019 khan phelin an MLA tam zawkin BJP an zawm a, chief minister hlui pali chiah an nei.
Kum tira an inthlan lai khan an MLA-te chu party danga pakai lo turin an lo intiamtir tawh.