Health Minister Dr R. Lalthangliana’n Guwahati-a Dr. B. Barooah Cancer Institute (BBCI) leh Guwahati Neurological Research Centre (GNRC) te tlawhin, an mithiamte puihna Mizoramin a mamawh thu an hotute a hrilh a. Puih an inhuam thuin an lo chhang.
Dr R. Lalthangliana chuan BBCI Director Dr AC Katatki leh hotu dangte kawmin, Mizoramah Cancer natna a tam avangin Mizoram doctor te tan short term training buatsaihsak tur leh Mizoramin Cancer Superspeciality Hospital a neih theihna tura an tangkai theihna zawna pui turin a ngen a. BBCI hotute chuan Mizo doctor tam thei ang ber cancer care and management-a training pek an inhuam thu an lo hrilh.
BBCI hotute chuan kumin October velah -One-day seminar on cancer care & management for north-east states’ pawh Mizoram sorkar nen tangduna buatsaih an inhuam thu Helath Minister chu an lo hrilh a. Health Minister chuan BBCI bi-yearly journal a tlangzarhsak nghal a ni.
Dr R Lalthangliana chuan GNRC Managing Director Dr Nomal Chandra Borah leh Senior Doctor te pawh kawmin, Mizoramin Neurology-a mithiam a tlakchham thu leh GNRC-a mithiamte puihna Mizoramin a mamawh thu a hrilh a. GNRC hotute chuan Mizoram doctor te short term training a thlawna pek an inhuam thua lo chhangin, Mizoram sorkar nena tangduna an Neurosurgeon te a tam thei ang ber Mizorama damlo en tura an tirh tur thu leh Mizo, an hospital pantu tawng thiamlo te tan tawnglettu an rawih tur thu Health Minister chu an lo hrilh bawk.