Wimbledon in hmeichhe singles champion thar a nei a, chak tura rinkai zawk hnehtu Elena Rybakina chu Kazakhstan atanga hmeichhe tennis a Grand Slam title la thei hmasa ber ni turin a champion.
Kum 23 mi Rybakina hian tun tournament a che tha tak mai seeded number 3 hauhtu Ons Jabeur chu huaisen takin a beilet a. Set hmasa ber a hloh hnuah 3-6 6-2 6-2 a chakin final inkhel hmuhnawm takah a lawm zawkah a tang a. Kum 2011 hnua Wimbledon singles inelna a champion thei naupang ber a ni.
Set hmasa berah Rybakina hi a zam tih hriat theih takin a inkhel a, final a luhna tura a tennis khelh thin ang a kheltha hleithei lo. Nimahsela set hnihnaah a insiamtha thei a. A ball vuak nat leh feet 6 a sang nula hian a sanna hmanga a service hlauhawm tak a chhawr a. Jabeur nawrtu zawkah tangin Tunisian star in tihsual a ngah phah a. A tawpah a hlawhtlinpui.Elena-i hun a inher
Russian mi Rybakina hi kum 1999 June 17 khan Moscow-ah a piang a. Gymnastics leh ice skating pawh thiam tak hian professional tennis a luhchilh hnuah kum 2018 khan top 200 a tlin hlimah Russia aia Kazakhstan tana khelh a thlang.
Kazakh citizenship a neih hnuah kum 19 mi hian Kazakhstan hnuaiah a khel a, Kazakhstan Tennis Federation chuan sum nena tanpui inhuamin an hnuaiah tennis a khelh chhoh zelna turah hmasawnna neih a inring zawk.
All England Club chuan Russian leh Belarusian player-te Wimbledon khelh a phalsak loh karah ani chuan harsatna nei lovin a khel.
WTA title vawi thum la tawh Rybakina hian ITF hnuaiah title pali a la tawh bawk a. Tun tournament-ah hain seeded number 17 niin final lut turin Coco Vandeweghe, Grand Slam champion tawh Bianca Andreescu, Zheng Qinwen, Petra Martic, Alja Tomljanović leh Simona Halep te a hneh.
A chak hnuah Rybakina chuan, “Nidangah chuan ka chak velah lawm a ka au pawh in hmu tawh ang. Tunah chuan mak ka ti lutuk a awm ngaihna ka hre lo zawk a ni. Thil tam tak ka rilruah a rawn awm nghal a, kha vang khan buai chiam loh kha ka tum ber a ni zawk.” tiin a chak veleh a a awmdan a sawifiah.