- Lallunghnema, Charity Lodge
Consumer Awareness kan nei tam ve ta zel a. Thil lawmawm tak a ni a. Kum 20 chuang zet kal tawhte kha chuan consumer tam takin right an neih thu reng an hre lo va. Kan thil lei leh service hman thuah kan mawl luat avangin thinrimna turah kan lungawi a,phunchiarna turah kan ngawi mai mai a. Bungraw hman tlak lo leh awmze nei lo fahran lei mah ila, khua leh tui tha ber ang zia zangin kan mo tha awm ve mai mai a. Sumdawng chalak hovin min theh phar vel mai mai a ni. Mi tam takin an at vanga an dikna leh chanvo an sual chhuah peih loh laiin tunah chuan bungraw chahnaa harsatna tawktu thenkhat chuan huaisen takin sumdawng depde tak takte chu an khing ngam a. Hetiang mi hi kan mamawh em em a ni.
Tun tumah hian Thlawhtheihna company pakhat hrem thu kan sawi dawn a. Tun hma atang tawh khan ka article hmasa lamahte khan Air company hrem thu ka ziak fo tawh thin a. Thlawhtheihna passenger lungawi lo hi palzutin an awm fo thin a. Mahse passenger huaisen te hi lo thlir liam mai mai chi an ni hauh lo mai. Hetiangah pawh hian keini Isua ringtu inti hauisen ho hi a dawihzep zawkah kan tang fo mai. Sumdawngho hmachhawn ngam leh hnial rap rap ngam hi chu mi tlem te an ni. Milem be ho bawk hi an lo huaisenin an lo rinawm zawk a nih hi, ka ti fo thin.
Tuna kan sawi mek pawh hi Kristian ni lo thubuai a ni tlat! Ka thian pakhat chuan Lunglei khawpui atangin he thu hi min thawn a, “Mizo ho thil chah chungchang leh dawra bungraw lei tawh thleng theih tawh loh hi lo sawi darh ka vawrh darh viau zel a nia.”
Ka chhanna : Mizo ho hian internet a thil chah hi kan intihhhmuh hle. Changkannaah kan ngai. A chahtute hi an changkang em? Ka hre lo. Thil chahtute zinga a tam zawk hian harsatna an tawk thin. A bungraw chah ang hmu lo, lungawi lo, ngawi mai mai an tam hle. Delivery boy zingah home delivery hnial an awm thin. Hengho hian dan an bawhchhia a ni. Bungrua lei tawh thleng leh theih loh tih hi sumdawngho duhthusam, an dan phuahchawp a ni.
Consumer Protection Act 2019 in a phal lo, tih chhiartuten lo hria ang che u. Theihtawp chhuahin zaithiam hovin zai an zir a, an thiam mai. Nang pawh hian theihtawo chhuahin consumer right hi zir la, i thiam mai ang. Chutih hunah chuan in chhungkua pawh in hlim tlang zawk ngei ang.” Ka chhang thui zek!
Kei ve hian Consumer Right Awareness ka atchilh bur a, thil dang ka ngaihtuah hman ta meuh lo. Lehkhabu 6 ka buatsaih ta! Pathian hnenah lawmthu ka sawi.
Chawlhkar tin Consumer Huang neiin consumer protection issue ka ziak thin. Ka lehkhabu ziakte hi hralh a kal lo tlangpui. Mahse a leitu leh chhiartuten an tangkaipui viau tih chu ka report dawn thin a ni. He thu ziak mawi tak hi han chhiar ve teh, tha ve deuh a nia!. Hei hian min tilawm a, phurna min pe a ni, kei mi tlawm ber hi!
“I thu ziakte ka lo chhiar ziah a hlawk thlak ka tiin keini mi rethei tan phei chuan a hlu leh zual tak zet a ni. Hmanni deuh khan washing machine kan lei a, vawihnih chiah kan hmannaah a chhia, complaint kan thehluta an rawn ngaihven duh lo va consumer forum a kal kan tum thu kan hrilh a, rang takin min rawn siam sak a. I thuziak kan hmuh leh chhiar hian finna leh huaisenna nasa tak min pe a, kan va lawm thin tak em! Zoram mipuite tan lo vul zel ang che. ” – hming thup.
Kan thupuiah tunah chuan kan lut tawh ang. Sap tawngin bul i tan leh mai ang aw. Indigo told to pay Rs. 1 lakh for cancelled flight. Chhan tha tak nei lova thlawhtheihna thlawh hun a thulh(cancelled) ringawt avangin Indigo chu cheng nuai khat chawitir a ni tihna a ni ber awm e. Ka thianpa(kawipa) Prof. Rka Colney khan engtin tak lo ngai ve ang maw! Ani hi consumer activist deuh roh a ni a – ve a!
Hei hi hmaih suh…ngun takin chhiar rawh.Kum 2019 November thla khan Guwahati tlawh tura programme nei turin heng thianzaho M. Sandeep Reddy, C. Raha Gopala Rao, G. Raghunadha Rao, P. Krishnama Naidu, Janakiramaiah Chetty leh O Veeresh Kumar te hian Indigo thlawhtheihna ticket Chennai – Guwahati chu August ni 25 khan(return journey nen) an la a. Complainant te hian November ni 7 ah Guwahati Airport an thleng ve mai bawk a ni. Indigo counter-ah chuan boarding pass 12 Indigo Flight No. 6E291 Guwahati – Kolkota leh Kolkota – Chennai an la fel vek a. Mahse, vanduaithlak takin heng thianzaho hian check-in te an tihfel hnua thlamuangtaka an thut dar dar laiin an ticket lak chu cancelled-sak an nih thu an hrilh ta thut mai a. A thinrim thlak piah lamah a lungchhiatthlak tak zet a. Ticket dang lak leh a ngaih phah ta a, Spice Jet thlawhtheihna company atangin ticket an la leh ta a ni ; cheng nuai khat zet an chawi phah a ni. Heng thianzaho lungawi lo hian Indigo Company chu Chittoor District Consumer Disputes Redressal Commission hnrnah an khing ta a. Indigo hi thiamloh chantir an ni a. Cheng nuai khat chawi tur leh tul lova man an sen belh Rs. 62,370/- leh zan khuaa mangang taka an tangkhangna man Rs. 38,136/- chawi turin relsak an ni bawk.
He Consumer Commission Judgement hi CAG whatsApp group news clipping, Pu Sangpuia, Dy. Controller Civil Aviation min pek a ni a, ka lawm hle a ni.
Chhiartuten lo hlawkpui theuh ula, kan lawm hle ang.