- Rothangpuia
Tunlai chu sorkar hnathawk nuar thawm hriat tur a awm leh tak zut mai, kum 2023 kan lo hnaih leh ta a, kan hotupa ber hian engemaw a lo tiam ve leh thin bawk nen nuar thawm hi kan la hriat belh zel pawh a rinawm. Tuna sorkar hnathawk lungawih lohna lan tir lian zual chu FMGE&W (a ngheta Mizoram sorkar hnuaia thawkte), FEMSE (Samagra hnuaia thawkte) leh NEUM (National Health Mission hnuaia thawkte) an ni a.
Mizoram sorkar hnuaia a ngheta thawkte (FMGE&W) hi Mizoramah nanana hi chuan mipui chunga leng an ni a, an hawina lam leh an bawh lam chu a kaw duak duak mai. Sorkar meuh pawhin a hlau chu a ni em lo ang a, an thu erawh a hnial khat hle. Mizoram mipui nuai sawm chuang zingah hian an dinhmun a duhawm fal nalh a, hna tha ber leh him bera ngaih a nih avangin hna hniam bera ngaih chenin kan inchuh luih luih thin a ni. An dinhmun hi a chhe lo mai ni lovin a awhawm em avangin sorkar hnathawk tam ber hian an thilphut ber pawh hi an enghelh teh chiam lo a, pawl hruaitu lamin nawrh tur an tih avanga badge dum bel ve ta mai hi tam tak an awm. An thil phut ber chu central sorkar hnuaia thawkten dearness allowance (DA) 34% an lak mek ang zat lak ve an phut a, tin pension hun hi kum 60 atanga 62 a tih san sak ang ngiat bawk a ni.
Central pay zulzuia kal an nih ve miau avangin thil awm lo tawp a ni hran lo a. Mahse Mizoram sum dinhmun hrechiang em em tu te berin hlawh tihsan beiseia an nuar a nih chuan sorkar hian a duhnaah chuan sum a la nei tih a tarlang nghal bawk. Kumtir maiah an DA hi 10% ngawta tihpun sak an nih tawh laia kum chanve em pawh a la liam hmaa nawrh an huaihawt leh nghal mai hi chu an ti lutuk a ni. State sum dinhmun a ziawm deuh hun nghak thei ber tur an ni a, fa u ber chan changa an thilphutte tuna an han hnukdawk hi thil lawmawm tak a ni. Anni chungchangah hian sawizui chakawm tak tak pawh la awm mahse duh tawk phawt ang.
National Health Mission (NHM) hnuaia thawkte an nuar ve leh mek a, sorkar laka lungawi lohna lan tir nana na ber pawla ngaih Mass Casual Leave hmangin bul an tan nghal rap mai a, an lungawina khawp hmalakna an hmuh loh chuan an kal zel dan tur an la rel leh dawn a ni. Anni hi CSS hnuaia thawk an ni a, Mizoram in Covid kan do na kawnga thawh hlawk em em te an ni. Tuna an thil phutte chu sorkar a dah ngheh (regularization) te, regular taka hlawh lak te, medical reimbursement leh transfer TA te a ni hlawm a. Hlawh an la khat viau thin a, regular taka hna an thawk a nih chuan regular taka hlawh lak an phu a ni. Anni lam hi chu an hlawh pawh a ziaawm thawkhat niin a lang a, tin annual increment an neih avangin an hlawh hi kum tina pung ve reng a ni a, khawsak hautak chho zel karah pawh regular taka hlawh an lak chuan mangang lutuk lova inenkawl thei tura ngaih an la ni. An thilphutte hi sorkar sum dinhmun thlir chunga tih hlawhtlin sak theih ni se an duhsak awm viau e.
Tuna mipui ngaihven leh thawm nei lian ta ber mai chu Samagra hnuaia thawk FEMSE te lungawi lohna hi a ni. Anni hian NEUM te ang lo takin an nawrh key an la hniam ang reng riau mai a, badge dum bel atangin an han tan phawt a ni a. An dinhmun ngaihtuahin sorkar lakah an la tim hle mai, kum 2019 a sorkar-in No Pay No Work a puankhum khan an tha a la tikhur deuh a nih mahna le!
Samagra (SSA&RMSA) hnuai thawkte hi service security nei lo chunga hlawh tlem tham tak nena hmun kilkhawr ber thlenga inzarpharh an ni a, thla 3 thla 4 lai te hlawh la lo chunga Mizoram zirna keng kawhtute an ni. Sorkar hnathawk dangte chu thil man sang leh khawsak hautak chho zel milin Annual Increment bakah hunbi neiin Dearmess Allowance a pung chho zel a, tunah 7th pay enjoy-in dinhmun awhawm taka an awm tawh a. Chutih laiin Samagra (SSA&RMSA) hnuaia thawkte chu kum 2011 Congress Ministry hmasa hunlaia hlawh revise sak an nih atang khan kum 11 chhung zet hlawh ngai ngar ngar ringin an la awm a. Kum tina hlawh pung chho zelte pawh an nuar tawh a nih chuan thil man to chho zel kara an khawsak harsat dan tur hi a hriatthiam theih mai awm e.
An thatlai hun Mizoram zirna atana theihtawp lo chhuah ve ngar ngar tute an ni tih hriat sak ila, an zinga thenkhatte phei chu kum over mai turte an ni tawh a. Hmanni maiah kum tam tak chhung hlawh ennawn sak lova awm tawhte beiseina siam sakin CM berin Vanapa Hall-ah an hlawh a pun ngei ngei dawn thu Mizoram mipui hriatah a puang tawh bawk a. Chuvangin sum harsatna karah pawh technical error tih vel hmanga chhuanlam siam kawi sak fo lova an hlawh hi chu tihpun sak thuai thuai an phu e.