South Africa-a Soweto khaw chhunga zu inna hmun, bar pakhata inpawng kahna thlengah mi 15 vel kah hlum an ni tih police-in an sawi.
Police chuan silai kengten Orlando East tavern hi Pathianni zing hma takah khan luhchilhin thalai lo awmte chu an pawng kah ta mai niin an sawi.
An duhtawk an tih zawhah hian minibus varin an tlanchhe zui nghal a, engvanga hetianga che nge an nih hriat theih an la nei lo tih an sawi bawk.
Hliam tuar pawh awm nualin thenkhat chu an na hle tih BBC chuan a a tar lang.
Thite hi thalai tak tak, kum 19 leh 35 inkar mite an ni hlawm.
Gauteng province-a police hotupa, Lieutenant General Elias Mawela chuan inbeihna thleng chu ‘zu inna hmuna pawisawi lo awmte rawng tak leh lainatna nei miah lova thahna’ tiin a sawi.
A pisa atanga thuchhuah a siamah a kaptute hi rifle leh 9mm pistol nen bar-ah hian an lut tih a tar lang bawk.
Police chuan a titute hi an chhui zui nghal a, tun thleng chuan tute nge an nih hriat an la ni lo.
Police chuan Pathianni vek khan chhimchhak lama KwaZulu-Natal province-a zu dawr pakhatah mi pali kah hlum an ni bawk tih an sawi.
South Africa-ah hian inkahna hi thil thleng fo a ni a, a bikin mi sual pawl inbeihna leh zu inna inkahna a ni thin.
Tun tuma thil thleng erawh thi an tam a, a hma lawkin East London khawpuia bar pakhatah rawlthar 21 zet tura hrai nge boruak tha lova that tih hriat lova tihhlum an lo nih tawh avangin ngaihven a hlawh hle a ni.