India chuan a thenawm, Sri Lanka-a eibar dinhmun chhia avanga mipui thinrim leh politics inlumlet mek karah sipai a tir dawn lo tih a sawi.
Thliarkar ramah hian India chuan venhim hna thawk tur leh a theih anga anga pui turin a sipaite a tir dawn nia sawina a awm a; mahse, hei hi a pha.
New Delhi chuan Sri Lankan mipuite tawrh chu a hre thiamin a hmuhpui a, a chin fel nan mipui rorelna kalhmanga thil kalpui chu a tha ber tih chu a dinna a nih thu a sawi.
India hian a thenawma thliarkar ramah hian a sipaite a tir dawn niin chanchinbu thenkhat leh social media-ah vawrh darh a ni.
Hei hi Colombo-a Indian High Commission chuan chhangin a nih loh thu a sawi a. “Hetiang thil sawi leh thlirna hi India sorkar thlirna leh dinna a ni lo,” tiin thuchhuah tawi tê a siam.
High commission chuan Pathianni khan external affairs ministry thupuangtuin India dinna chu chiang taka a sawi tawh thu pawh tar langin, “India chu Sri Lanka mipuite dinna a hre thiam a, an duh anga ngialnghehna leh dinhmun tha pangngai chu mipui rorelna kalhmang leh a hlutna lantir chungin kalpui turin a duh a ni,” a ti
External affairs ministry thupuangtu hian Sri Lanka laka New Delhi dinna chu a lo sawi tawh a, politics thilah chuan tumah nawr a tum lo.
India hian kuminah ringawt pawh a thenawm hnenah hian puihna $ tluklehdingawn 3.8 chuang hu a lo pe tawh a. Heng zingah hian tuialhthei, ei tur leh damdawi mamawh zualpui leina tur a tel bakah pawisa pawh a lo thlengpui tawh.
External affairs ministry thupuangtu, Arindam Bagchi chuan Sri Lanka-in chona hrang hrang a hmachhawn mekah a mipuite kiangah a ding reng tih a sawi a. Thil thlengte chu a ngaihven reng tih a sawi bawk.
Pathianni vek khan External Affairs Minister S Jaishankar chuan Thiruvananthapuram-a thuthar lakhawmtute a kawmnaah an buaina chu mipuiin a chin felna an hmu thuai dawn niin a lo sawi tawh bawk.
“Sri Lanka hi kan thlawp a, puih kan tum a, kan pui zel bawk ang. An buaina ching fel turin an thawk mek a, kan nghak a, engnge lo thleng tur kan thlir a; Sri Lanka tana a chhanna chu Sri Lanka bawk hi a ni,” a ti.
Thenawm ram chuan an kalphung siam thaa an leibate titlem turin inrawnkhawmna an kalpui tan mek niin a sawi bawk.
India tan hian thliarkar rama sipai thawn luh hi thil ngaihtuah ngun ngai tak a ni a. Kum 1987 leh 1990 inkar khan Sri Lanka-ah hian India Peace Keeping Force (IPKF) chu lutin sipai 1,200 vel an thi a. IPKF-te hi Sri Lanka-in LTTE helho chhut chimih tuma a beih laia pui tura tirhte an ni.