Novak Djokovic-a’n Wimbledon a thunun hnehna chu a chhunzawm a, SW19-ah hneh a harsatzia lantir lehin Pathianni zan final-ah a khingpui Nick Kyrgios chu a hneh a. A zawna vawi li nan mipa singles inelnaah a champion.
Kum 35 mi Serbian star hian a khingpui lakah hian service hloh hmasa zawk mahse 4-6 6-3 6-4 7-6 (7-3) in Centre Court-ah hian hnehna a chang a. Wimbledon-ah vawi sarih a champion-na niin champion hnem ber Roger Federer chiah a la pha lova, pakhatin a la nei tlem zawk.
Hnehna a chan avang hian Rafael Nadal-a’n Grand Slam record ni tura title 22 a lak chu pakhatin a la pha lo mek bawk.Final boruak a dang
Inelna a seeded number 1 hauhtu Djokovic-a’n a khingpui kum 27 mi aiin bul a tan tha lo zawk a. Tunlai tennis a bitum hlawh ber player hi a khingpuiten a lakah bul tan that an tum thin a, hlawhtling thei thin mahse a tawp an daih zo thin lo.
Pathianni zanah pawh hetiang hi niin Kyrgios-a’n set a la hmasa a, a service tha chhawrin inrintawkna lian tak nen a khel.
Nimahsela set hnihna atang Djokovic-a puitlinna leh rilru paukhauhna a lantir a. A tawnhriat chhawrin ball a dahna a dik thin hle a. Tihsual a neih tam duh tlat loh avangin court chhunga a nungchang avanga sawihlawh thin Kyrgios a tibuai nasa.
Inkhelh chhungin Kyrgios a tawng hnem a, pawn lam hawi a a tawng thin laiin Djokovic erawh a buai lova. A tawpah harsatna lian a tawk lem lo.Champion lai a lawm
Djokovic hi SW19-ah a chungnung fal a, kum 2017 ah quarter-final a inhliam avanga a inhnuhdawh hnuah helai hmunah hian tlawm a la nei leh lo.
“Wimbledon hi ka nun a hun pawimawh leh tennis a ka tana hun pawimawh a lo kal a ni ziah thin.”
“Kuminah pawh ka hun paltlangte ngaihtuahin ka tan thil lawmawm tak a ni a, a hlu a, rilru ah pawh thil tak tak a sawi.” a ti a.
“Kumin bul ka tan danin min nghawng lo thei lova, rilru lamah pawh min nghawng a, tin ka inkhelh danah pawh awmzia a nei thui. Nimahsela zawi zawiin hmalam ka pan dawn tih ka hria.” a ti bawk.
A khingpui chu fakin, “Talent ropui i ni a, final hi i la khel theuh dawn tih ka hria. Khawvela player tha ber zing ami i nihna i lantir.” tiin a sawi.
A khingpui Kyrgios pawhin Djokovic chu fakin, “Ka kheltha viau chuan ka hria a, mahse ani hi chu tennis khawvelah chuan pathian ang deuh a ni rih.” tiin inkhel zawhah a sawi.