MNF an inhmulian; an hotupa thusawi a ngaihnawm chho tan
Nakkum maiah MLA inthlanpui kan hmachhawn leh dawn ta. Political party hrang hrangin thapui thawh tanin, an insawi lian chho tan leh hle tawh mai a, an tlin ngei theih dan tur an sawi nasa leh tawh hle.
Kan CM leh sorkar lai MNF party president ni bawk phei chuan eptu lam party lian pahnih ZPM leh Congress lamin an MLA neih dan tur thlengin a ngaihtuah kim leh tawh hle mai a, under 10-a awm tur ve ve in a chhutchhuak leh der tawh mai.
Inrinni khan Lungleia an party office, Mizo Hnam Rûnah chhung inkhawm hmanpuiin CM hian thu a sawi a, kum 2023 inthlanpui lo awm turah Congress party hian MLA panga vel bak an neih a rinawm lo va, ZPM pawhin under 10 an pel a rinawm lo tih chu mi thil chik mite hmuh dan a nih thu a sawi.
Party dang hian engtinnge an inchhut ve ang tih hriat a chakawm tawh hle a, zawlnei der ang maia hma hun ‘risk’ sual fe fe hi chu an awm ngei dawn. A ngaihnawm chho leh tan dawn hle bawk. Tlin tumin theihtawp chhuah chho zel phawt mai se, an tawngkam ngaihnawm tak takte hi nakin zela mipuiin kan chhinchhiah tur a ni bawk tih hriain, tun atangin theihtawp chhuahin tlin ngei tumin thapui thawh tan ngei bawk teh se.