Aizawl: MNF party adviser, MLA ni bawk, L Thangmawia’n COVID-19 vanga zirtirtu lak tur a khaihlak avang leh zirtirtu indaih lohna a nasat bawk si avangin SEDP sum atanga zirtirtu rawih an nih thu leh a hming chauha lawmman pek an nih thu a sawi.
Human Resource Development Board vice chairman ni bawk chuan he thu hi nimina MNF party chhung inkhawmah a sawi a. A pangngaia hna lak theih a nih leh ve leh SEDP teacher chu tawp leh mai tur a nih thu leh tun hnaiah pawh primary leh middle school-a zirtirtu indaih loh zualpuinaah SEDP teacher 771 rawih thar leh an nih thu a sawi.
L Thangmawia chuan hri len hmain high school zirtirtu 157 lakna tur tihfel ni mah se hri leng avanga inrenchemna (austerity measure) kalpui a nih zui tak avangin zirtirtu chu lak theih a ni ta rih lo niin a sawi a. MNF sorkar tirha thingtlang khaw 400-ah tal zirtirtu quarters awm tura an rel, central-a an dil tawh pawh hri leng avang bawkin a la hlawhtling thei lo niin a sawi bawk.
SEDP board 14-te chu Congress hunlaia parliamentary secretary ang an nih loh thu L Thangmawia chuan sawiin, “Board hmalaknate hlawhtling thei ni se board enkawlna atana senso let nga kan hmu tawh ang,” a ti.
L Thangmawia chuan COVID vanga harsatna thleng avanga engmah tih theih a nih loh lai pawhin eptu pawlten chief minister leh council of minister-te sawiselna tur an hre lo nia sawiin, “Selna tur an zawng chawp,” a ti a. Hri leng karah ni 100 inhlawhna, gas, buhfai leh ei leh in lak luh kawngah pangngai takin thil a kal thei niin a sawi.
“Lehkhathiam kan duh a, saptawng kan uar lutukna lamah kan hnam tawng kan thiam tha ta lo va, kan tu leh fa ten mahni hnam tawng an thiam meuh ta lo,” L Thangmawia chuan a ti a. Saptawng chauh ni lo, hnam dang tawng hrim hrim Mizo tawnga seng luh a ngai ta nia sawiin, chutiang ti thei tur thuneitu sang, Mizo Language Development Board chu chief minister ruahmannaa din a nih thu leh hei hian ram leh hnam tan Mizo tawng hmasawnna tura nasa taka hma an lak theih tur thu a sawi bawk.