Paul Pogba chuan Manchester United ah contract a hman zawh hnuah Juventus a zawm leh a, kum li contract a ziak.
Kum 29 mi France midfielder hian Serie A title vawi hnih Turin club tan hian a lo chawi tawh a. Manchester United a bul a tan hnuah Juventus-ah hian free transfer in a kal a. Kum 2016 khan United in a hunlaia khawvela player manto ber ni turin Pound maktaduai 89 in an lalut.
Zirtawpni khan Turin hi thlengin kartawpah khan medical a nei a, Thawhtanni zanah club in an phochhuak.
Pogba hian April 19 hnuah inhliam avangin Manchester United tan football a khel leh tawh lova. Club leh player-te indawr mahse hlawh a phut ang chu United in an pe duh lova, hei vang hian a contract a hmang zo.
“Ka lo kir leh thei hi ka hlim hle a, hetah bul tan that leh a trophy tam tak chawi leh ka nghakhlel tawh hle.” tiin a sawi a. Juventus pawhin, “Rawlthar duhawm tak niin a liam a, tunah mi puitling leh champion ropui niin a lo kir leh a, kan club chanchin kan ziakdun leh dawn.” tiin an lo lawm ve bawk.t
Pogba hian United tana a khelh chhungin vawi 233 a inkhel hman a, goal 39 a khung hman.