Khawvela pawisa khelhna hmunpui ber, Macau-ah tun hnaiah coronavirus a darh nasat avangin an casino zawng zawng chu kum hnih chuang hnua a vawi khat nan Thawhtanni atang khan an khar.
Thuneitute chuan ni tin mamawh zawrhna ni lo zawng, casino 30 chuang zet huamin chawlhkar khat chhung khar turin an ti a ni.
Khawpuiah hian June thla laihawl atang khan Covid kai mi 1,526 hmuh an ni tawh.
Chinese thuneihna hnuaia awm, Macau khawpuiah hian inkhelhna bik atanga pawisa hmuh leh leng vel pawh a tlahniam nghal duai a ni.
Kum 2020 tir lam hnua Covid a darh nasat ber tum an tawn mekah hian mi 19,000 vel chu inkhung hrantir an ni.
Sikul leh hlimhlawp tihna hmun, bar leh ennawm chhuahnate chu a hmaa thupek lo chhuah tawhah khar a ni tawh bawk.
Kartawpah khan Macau-a Government Information Bureau chuan sumdawnna hmun zawng zawng chu ni tin mamawh a chatlak lohna tur thil ang chi leh vantlang mamawh ang chi thil a nih loh chuan khar vek rih a tul thu a puang.
“Hei hi kan khawtlanga Covid-19 darh mek chhut chahna tura rahbi thar a ni,” tiin Inrinnia bureau-in thuchhuah an siamah an tar lang.
Mipuite chu ina tawm tur leh pawn lama thil ei chhuak lo turin an ngen bawk.
Macau-a cheng 90% chuang hian Covid vaccine dose hnih an la tawh a, booster dose la tawh zat erawh hriat a ni rih lo va. Tunah hian Omicron variant chuan a vawi khat nan a tibuai mek a ni.
Tun hnaiah thuneitute chuan damdawi in an din chawp a, casino resort eng emaw zat chu inenkawlna hmun atan an let a. Portuguese awpna hnuaia awm thin khawpuiah hian damdawi in pakhat chauh a awm a, mi 6,00,000 chuang an cheng thung.
A cheng zawng zawngte endik rûnpui an nei tawh a, hri kaite awmna apartment building leh khualbuk kharkhip pawh an nei.
China-in ‘Covid awm lohna’ kalphung an neih chu an zawm ve a; mahse, a runpuia endik tih loh chu khawpui pum inkharkhip ang chi chu an kalpui ve lo.