Aizawl : Siaha district-ah nikum January atanga kumin June thlenga HIV test 2053 zingah HIV hrik pai 105 (mipa 87 leh hmeichhia 18) an awm a. Malaria test 25037 zingah Malaria hrik pai 611 hmuhchhuah an ni bawk.
Siaha district development co-ordination & monitoring committee thutkhawm nimina neihah he thu hi tarlan a ni a. Siaha district-ah hian PHC 4 awm mekin, PHC 3-in doctor an nei lova. Sub centre 37 awmah health worker pakhat chauh awmna 25 niin, sub centre 9-ah health worker an awm lova, sub centre 13-ah IV grade an awm lo.
Nikum January atanga kumin June thlengin Siaha district-ah naupiang 1852 an awm a, nau piang zinga 1549 te chu damdawi in-a piang niin, in lama piang 326 an ni. Hemi hun chhung vek hian Siaha district-ah nausen thi 41 an awm a, nu, nau chunga thi an awm lo thung.