Aizawl: Congress Thalai chuan Mizoram University (MZU) zirlaite tan bus a tlan thei tawh lo tur chu pawi an tih thu sawiin, zirlaiten harsatna nasa zawk an tawh hmain chak taka hma la turin Mizoram sorkar an phut tih an sawi.
An thuchhuahah MPYCC chuan sum lama harsatna an neih avangin MZU chuan man chawia an hawh bus an titlem zel a, Covid-19 len hnuah bus hi panga aia tam hire thei tawh loin bus panga an hman mek pawh July thla thleng chauh a tlan theih tawh dawn avangin August thla atang chuan mahni thiam dan angin zirlaiten MZU an pan a ngai tawh dawn a, hei vang hian zirlaite an mangang lawk tih an sawi.
MPYCC chuan MZU zirlaiten man tlawm zawka bus an chuan theih nan state dangten an zirlaite tan transport department-in subsidised rate-a bus an chuan theih nan bus pass an pe chhuak thin angin Mizoram sorkarin pawhin siamsak ve turin an phut tih an sawi a. Transports department bus a tlantir thei lo a nih pawhin ACBOA-te dawra Aizawl Temple leh MZU Campus inkara tlan tur city bus ruahmanpui turin an ngen tih an sawi bawk.
MZU zirlaiten MZU bus service awm lo tur avanga harsatna an tawh lohna tura sorkar hmalak dan an ngaihchan reng tur thu leh zirlaite tan hian suangtuahna ni lo, ngaihtuahna tak tak seng tawh turin MNF sorkar an phut tih an sawi bawk a ni.