Nottingham Forest chuan Premier League season hmang turin an squad an thuam tha chhunzawm a. Liverpool defender Neco Williams chu kum li chhung atan an lalut.
Wales right-back kum 21 mi hian season liamta khan January thlaah Fulham hnenah loan a khelin Premier League a an kaisanna kawngah tha a thawh a. Tun nipui a Forest in player an lakluh parukna niin England a league sang ber a hun hmang turin an inbuatsaih mek.
“Forest hi chanchin ropui tak nei club an ni a, an khelmual City Ground pawh hi hmun danglam bik tak a ni a. He hmunah hian kan fans zawng zawng hma a inkhelh ka chak tawh hle.”
“Forest tana ka khel tur hi ka phur tawh a, Premier League-ah hma kan sawnna turin ka theihtawp ka chhuah ang.”
“Head coach nen kan inbe tawh a, tum sang tak an neih thu ka hria a, he chona thar hmachhawn tura ka teammate thar te bula inkhelh ka chak tawh hle.” tiin a sawi.
Wales tana vawi 21 inkhel tawh Williams hian Liverpool first team tan vawi 33 inkhel tawhin midang goal khung tur vawi ruk a siamsak tawh.
Forest hian tun nipuia player an lakluh langsar zingah telin Manchester United goalkeeper Dean Henderson, Nigeria forward Taiwo Awoniyi leh defender Giulian Biancone te hnung a zui.