An ram mipuiten an ram sum leh pai a enkawl thiam lo tia puha dinhmun chhe taka an awm chhan bera an sawi, Sri Lankan President Gotabaya Rajapaksa chu a bâng dawn tih prime minister pisa chuan a puang chiang ta a. A hmain mipui hian a chuah theih nan an chenna in an luhchilh.
Mipuite hian president leh prime minister in an luhchilh hnuah hian an nihna atanga an chawlh hma loh chuan chhuahsan an tum lo tih an sawi.
Parliament Speaker chuan president hi July 13-ah a bâng dawn tih a lo sawi tawh.
A chin hriat lohva awm mek, Rajapaksa hi Inrinnia a in an luhchilh hnuah vantlang hmuhah a la inlan leh lo.
Navy lawngah an ram tuipui chinah a awm niin sawi a awm a. Mipuiin presidential palace an luhchilh hma khan hmun himah hian lak a ni.
President hi an ram eibar dinhmun chhiat chhan bera puh a ni a, hei hian ei tur, tuialhthei leh damdawi chu rei tak a ngheitir.
A bân tur thu hi Inrinni khan parliament speaker chuan a sawi tawh a; mahse, Sri Lankan tam tak chuan thuneihna chan zui tuma a chetna ni maiah an ngai thung.
Thawhtanni khan Prime Minister Ranil Wickremesinghe-a pisa chuan thuchhuah siamin Rajapaksa chu Nilainiah a bân tur thu a tar lang.
Sri Lanka ram danah chuan bâng tak tak tur chuan speaker hnena lehkha a thehluha pawmsak a ngai a, hei hi a la thleng rih lo.
Prime Minister Wickremesinghe pawhin a nihna atanga a bân tur thu a sawi tawh bawk a. Ani hi Inrinni vek khan a chenna in halsak a ni.
Pathiannia palace chhunga awm mipuite chuan president a bân hma chu an luah zui rih dawn tih an sawi.
“A hrehawm tak zet a ni,” tiin a fanu tleirawl pahnih nena a compound tlawhtu, Nirosha Sudarshini Hutchinson chuan a sawi.
“Mipui rorelna kahmanga president atana thlan chuan hetiang hian zahthlak takin a chhuah a ngai a. Kan lo vote pawh kha a zahthlak hle a ni,” a ti.
Pathianni khan politician eng emaw zat chu thukhawmin thuneihna inhlan tluang taka a kal theih dan tur an sawiho.
Speaker chuan BBC World Service Newshour programme-ah president a chawlh atanga chawlhkar khat chhungin party tangrualte sorkarna din thuai a tul thu a sawi.
Political analyst leh human rights lawyer Bhavani Fonseka chuan, “Kan hmabak hi politics-a thil vir vel dan tur khirh leh sawilawk harsa ber a ni dawn,” tiin Reuters news agency hnenah a sawi a, hruaitu langsar pahnih an bang tur erawh thil pawimawh tak a nih thu a sawi bawk.