Ferrari car khalhtu Charles Leclerc chuan intlansiak chhungin world title inchuhnaa a elpui Max Verstappen chu vawi thum ngawt a lehpel a. Austrian Grand Prix-ah Italian team tlanchak fal hle in hnehna chiang takin an chang.
Ferrari car khalhtu dang Carlos Sainz chu pahnihna ni ngei tur a ni a, nimahsela lap 14 a awmin a car engine atangin mei alh rawn chhuak avangin a tlan zo thei lo.
Intlansiak tawp lamah Leclerc-a car ah hian chiang lo a awm ve thova, a ‘accelerator pedal’ chu tang leh thinin hian harsatna a tawk. Hei hian gear thlak harsatna a siam bawk. Red Bull car khalhtu Verstappen chuan a elpui hnaih nan hmang mahse a lehpel zo chuang lova, Leclerc a chak zawk ta tho.
Hnehna a chan avangin Leclerc hian world championship a Verstappen a hmahruaina chu point 38-ah a tihniam a. Intlansiak tlan zo thei lo Red Bull car dang Sergio Perez chu a khum chiah bawk.Ferrari tan lawmna
Tun season-ah car an nei tha a, season tirah che tha nghalin hma an hruai nghal. Nimahsela Ferrari hian tihsual neuh neuh an nei leh thin a, an car chiang lo avanga tlan zawh theih loh awm leh thin bawkin tunhnai intlansiak hnuhnung pangaah beisei ang result an nei lo leh thin.
Pathianni zan intlansiak hi Austria rama Spielberg khua a Red Bull Ring-ah neih a ni a. Austrian company Red Bull chu he tlankawng neitu hi niin Milton Keynes, UK a an inkhuar chungin Red Bull Racing ‘home race’ a ni.
Tlankawng ngil thui lai pathum a awm a, kawng kualte a ulh loh bawk avangin tlan chak theihna a ni a. Kartawp practice leh qualifying-ah Ferrari leh Red Bull an tlan chak fal.
Tun season intlansiak pathum-ah ‘sprint race’ neih tur a ni. Inrinni a qualifying neih thin chu Zirtawpni ah sawn a ni a, Inrinni ah intlansiak pangngai a lap tlan tur zat hmun thum a then a hmun khat tlanin intlanchak siak an nei thin. Heta result hi intlansiak pangngai a bul an tan dan tur a ni.
Sprint race-ah Verstappen-a’n pakhatna a hauh a, Ferrari car ten an um a, an inthlauhna a tam lo chungin Red Bull an tlanchak. An driver Sergio Perez chu qualifying-ah tlankawng sir a dai thui lutuk avangin a ‘lap time’ paihsak a ni a, 13-na atanga tanin Sprint race-ah panganaah a chho thei, Red Bull tlanchakna a tilang.
Pathianni ah erawh engkim a inthlak danglam a, hei hi Pathianni zing lama ruahsur vang a ni.
Ruahtuiin car te lo tlan hnum tawhna tlankawng a tlengfai a, kawng a tidai bawk. Hei hian awmzia a nei thui, Red Bull car in tyre a heh phah a, kawng dai ah Ferrari tyre a daih rei.
Intlansiakah hei hian danglamna a nei thui a, Verstappen-a’n medium compound tyre chu lap 13 chauh a hman phah a. Ferrari erawhin lap 12 dang an hmang thei. Tyre chul zawk an hmang chung pawhin Ferrari car an tlanchak zawk tlat a, Verstappen hi Leclerc leh Sainz ten an car ke thlak chhunga an hmaah a lo awm leh hman pawhin an lehpel leh zel thei.
Leclerc-a’n Australian Grand Prix hnua hnehna a chan leh hmasak ber a ni a, car chiang lo avanga a vanduai thin bakah a team in thutlukna an siam sual thin avangin Verstappen nen inthlau hman mahse beiseina thar a nei.
Hetihlai hian Ferrari buaina pakhat a la awm a, chu chu an car a ni. Tlanchak thei hle mahse a rintlak loh leh thin. Sainz-a tlan zo thei lo chu engine kaihhnawih bik avanga Ferrari vawi li an tawp hma bikna a ni.Midang result
Kar hmasa ang bawkin Red Bull Ring hi tlankawng mam a ni a, intlansiak hmabak pahnih a tlanna tur pawh a ni tho. Hei hi Mercedes car mil tura ngaih a ni a, Anglo-German team an che tha reng. Lewis Hamilton chuan a zawnin vawi hnih nan pathumna a hauh a. George Russell chu palina a ni bawk.
Intlansiak hmasa a che tha Haas an che chhunzawm a, Mick Schumacher chuan parukna a hauh a, Kevin Magnussen-a’n 8-na a luah. Anni ang bawkin Alpine an che tha a. A tawp dawnah Fernando Alonso tawnhriat neih that a pawimawh.“Ka mamawh chhanna”
“Ka tan intlansiak duhawm a ni a, a tawp khar harsa deuh mahse kan tlanchak em em reng. Mak angreng tak chu Carlos-a buai lai vel tak khan ka car a rawn buai ve a, mahse engine lam a ni lo tih ka hria. Tunhnai intlansiak hnuhnung panga ka tan a harsa em em a, thil a kaltluang thin lo. Hei vang hian tun tuma hnehna chan hi ka mamawh hle.” Leclerc chuan a ti.