Sorkara an thil phutte tihhlawhtlin a nih loh avanga nikum lama a huhoa chawlh laa an nawrh hnuah nimin atang khan NHM, Mizoram hnuaia thawkten chawlh a la tan leh a, damdawi in lama inenkawlna pawhin a tawrh phah nasa a. Hetihlai hian Mizoram sorkarin health department hnuaia thawkte nawrh khapna thupek a tichhuak.
National Health Mission Employees Union (NEUM) huaihawtin nimin atang khan NHM hnuaia thawkten sorkar kar nan chawlh an la tan a, nuar mekte hi health department hnuaia hmun hrang hrang - district hospital, CHC, PHC, SDH, UPHC, sub centre, health & wellness centre, emergency services leh pisaa thawkte an ni.
Hetianga NHM hnuaia thawkte an nawrh avang hian Mizorama damdawi in lama inenkawlna pawhin a tawrh phah a, The Zozam Times-in sorkar damdawi in a fan kualnaah pawh NHM hnuai thawkte an nawrh avang hian hna a khaihlak phah tih a lang.
ITI Venga Urban Primary Health Centre-ah pawh thawktu tam zawk chu NHM hnuaia thawk an ni a, nimin khan UPHC-ah hian doctor leh IV Grade pakhat ve ve chiah hnathawkin an kal a, damlo enkawlna kawngah harsatna an tawh phah tih The Zozam Times an hrilh.
Civil Hospital, Aizawl leh Lunglei-ah pawh thisen leh zun bakah thil dang endikna hmuna thawkte chu NHM hnuaia thawkte an ni a, nimin khan endikna kalpui hleih theih a ni lo.
Nawrh an huaihawt chungchanga The Zozam Times zawhna chhangin NEUM President Malsawmtluanga Hauhnar chuan, an thil phut hrang hrangte zirchiang tur hi sorkarin study group din tawh mah se hmasawnna tak tak a awm lo tih a sawi a, “Sorkarin min ngaihsak lo hi kan lungawi lohna pakhat a ni a, a dangah chuan hlawh kan la regular thei lo hi a ni bawk a, chhungkaw eibel bera kan hman a ni a, ba kan ngah phah a, harsatna kan tawk nasa hle,” a ti.
An thawh hlawh chu regular takin la thei se study group thutlukna chu hlawh nei chungin an nghak thei tih NEUM president chuan a sawi bawk.
Ni thum chhung chawlh an lak chhunga an thil phut chungchangah hmasawnna hmuh tur a awm lo a nih chuan an kal zel dan tur chu NEUM executive committee-in an rel tha leh dawn tih a sawi bawk a ni.
Hetihlai hian Health & Family Welfare Department-a principal secretary chuan July 8, 2022 khan Covid-19 darh leh mek avangin health department hnuaia thawkte nawrh khapna thupek a tichhuak.
Nawrh khapna thupek hi Mizoram Essential Services Maintenance Act, 1990 tlawhchhana chhuah a ni a, thupek zawm lote chu MESMA Section 6 angin hrem theih an nih thu leh thupek hi thla ruk chhung awh tur a nih thu a tar lang a ni.