Local aministration department (LAD) Minister K. Lalrinliana’n 15th Finance commission grant atangin village council ten khawtlang mamawh hmasawnna hna hrang hranga atana an hman tur 2020-2021 ah Rs. vbc 93.00 hmuh a nih thu leh VC te account-a a luh vek tawh thu sawiin, hna tam zawk thawh zawh tawh a nih thu a sawi.
LAD hotute nena LAD-a peng hrang hrangte hnathawh hnathawh an thlirletnaah he thu hi LAD Minister chuan sawiin, kum 2021-2022 grant atan Rs. vbc 69.00 dah a nih thu a sawi a. Central sorkar kalphung thar angin 2021-22 atang chuan state treasury atanga VC account-ah direct a lut tawh tura tih a nih avangin IFMIS kaltlanga bill siam a nih tawh thu leh sorkar kum hmasaah VC account engemawzatah a luh tawh thu sawiin, a bak chu sorkar kum kal mek 2022-2023 chhunga hman theih tura Finance department-ah dil mek a nih thu a sawi bawk.
K Lalrinliana chuan Panchayati Raj system nei ve lo state ten 14th finance commission grant an dawn loh aia pek excluded area grant pawh kum 2018-2019 ah Rs. vbc 45.44 leh kum 2019-2020-ah Rs. vbc 16.24 an dawn thu a sawi a. Heng sum te hi K-deposit-ah engemawchen dah a nih hnuah tunhnaiah Rs. vbc 5.00 hman phalna pek an nih thu leh la release bak te pawh hmu thuai tura hmalak mek a nih thu a sawi.
LAD Minister chuan tualchhung inrelbawlna (rural local bodies/village council) tichak turin sorkar laipuiin kum 2018-2019 atanga 2021-22 chhung khan Rashtriya gram swaraj abhiyan (RGSA) scheme a thawhkhat nan a kalpui tan tih a sawi a. “2022-2023 atanga 2025-2026 thlenga kalpui tura thuamthar leh changtlung zawka kalpui leh mek a ni” a ti.
“VC house thar 10 sak ni tawhin, a hlui thawmthat 7 bakah sum dinhmun a zirin 140 a tahtawla sak a ni a, a hlui repair mek 95 a awm” a ti a. Common service centre dah tawh 10 leh dah tura hmalak mek 10 a awm thu leh RGSA scheme atangin VC 193 hnenah computer set sem a nih tawh thu leh VC 50 dang tan chah mek a nih bakah VC 591 te pawhin an dawn thuai theihna tura hmalak mek a nih thu a sawi.
LAD Minister chuan RGSA atang bawkin SIRD & PR hmunah State Panchayat Resource Centre leh Champhai, Mamit, Serchhip, Siaha, Kolasib leh Lawngtlaiah district-ah District Panchayat Resource Centre neih a nih tawh thu sawiin, Hnahthial, Khawzawl, Lawngtlai leh Saitualah pawh nei tura ruahman a nih thu a sawi.
VC ten anmahni kutkawiha an sum thawhchhuah tihpunna tur project – Bilkhawthlirah Kuhva hnah atanga plate siamna project Rs. nuai 49.00 man kalpui mek a nih thu pawh LAD Minister chuan a sawi a. Thenzawlah ‘Handloom Design Training cum Production Centre’ Project Rs.nuai 141.23 man kalpui tan a nih thu leh Tuipui Darzokaiah ‘Homestay’ Project Rs. nuai 84.00 man kalpui tura ruahman a nih thu a sawi bawk.