Champhai district-a lirtheia eizawng inzawmkhawm pawlin vawiin atangin ram dang atanga bungraw lo lutte an dang tan dawn a, Tiau kai bungraw luh theihnaah an duty dawn.
Champhai District Lirthei Inzawmkhawm Pawl (CPDLIP) hian July 9, 2022 khan General Assembly an nei a, pawl hmalakna tur an rel zingah international border kaltlanga ram dang atanga bungraw lut thin zingah kuhva mal thlur bika tihtawp tumna awm mek chu tha lo tiin dan loa bungraw lut reng reng chu tihtawp a nih theih nan hmalak an rel a ni.
An thurel bawhzui hian vawiinah Tiau kai bungraw luh theihnaah duty insiamin, dan loa bungraw lut turte chu Mizoramah lak luh a nih loh nan an lo dang dawn a. Khankhawn police check gate, Mualkawi dai leh Ngurkawnah te pawh an duty dawn a ni.
Hemi chungchanga The Zozam Times zawhna chhangin CPDLIP President Liantluanga chuan Champhai district chu Myanmar trade-a awm an ni a, chunga a zar an zo theihna ber chu kuhva a nih thu a sawi a, hetihlai hian mi thenkhatin mipui thinlungah kuhva chu thil sual ber angin an chhuah tiin, mi tam tak eizawnna tih chhiat a nih mek thu a sawi.
Kuhva rah sumdawnna chu kalpui leh ngei chu Champhai mipui tam tak duh dan a nih thu Liantluanga chuan sawiin Myanmar atanga dan loa Mizorama lut zawng zawng bungruate chu thil dik lo vek a ni tiin, dan loa lut theuh theuh chu a lian leh a te thliar loin danchah vek an tum tih a sawi a ni.