Tun dinhmuna number one ni mek, ‘Thor: Love and Thunder’ chuan khawvelpumah cinema hall-ah mi tam tak ko khawmin fan te’n Chris Hemsworth channa an fakrawn lai hian China rama tlangzarh tur hun hrilh an la ni lova, LGBTQ lanna a awm vangin tihchhuah an khap dawn nge, engtinnge an insiamrem dawn tih chu ngaihvenhlawh tak a ni ta.
China ram hi Marvel films chetthat falna leh sum tam tak sengluhpuitute awmna ram a ni a, heti anga market lian leh zau takah an tichhuak thei lo a nih vaih chuan khawvelpum huap anga an sum lakluhin a tuar ngei ang.
Pixar kutchhuak, ‘Lightyear’ ang tho khan LGBTQ lanna a awm vangin censorship a tawngbaw ngei tura ngaih a ni a, Pixar chungchangah pawh khan China chuan Disney hnenah taksa anpui in kiss lang chu paih turin a ti a, studio lam erawh chuan he ngenna hi an hnawl. LGBTQ lannna film hi khung middle east ram leh Asian ram thenkhatah an dawngsawng tha lo hle a, chhuah khap bur a ni fo.
‘Thor: Love and Thunder’ a inlan, Valkyrie hi bisexual a nih bakah Korg hi gay a lo ni lehzel bwk a, LGBTQ scene thenkhate hi China sorkar chuan a enliam nghal mai hauh dawna lova, insiamrem dan kawng an zawh emaw a nih loh vek chuan tihchhuah khap bur te pawh a ni thei.
Kum 2017 khan ‘Thor: Ragnarok’ khan China box office-ah $Maktaduai 112 a lo lalut tawh a, heti zat sum lalut thei a nih miau vangin film siamtute tan China market hi thlawhkhum theih a ni reng reng lo.
Hripui leng vuakveta tihchhuah ‘Black Widow’ atanga ‘Eternals’ te bakah ‘Sang-Chi and the Legend of the Ten Rings’ te, ‘Spider-Man: No Way Home’ te pawh hi eng emaw chhan hrang hrang vangin Marvels lam chuan China ram an tlangzarh theih thun tur an sawichiang thei lo.