Manchester City midfielder Rodri chuan kum thum contract a ziah belh a, Etihad Stadium-ah a cham chhunzawm zel dawn.
Spain international hian kum 2027 thleng daih contract thar a ziah thu club in Thawhlehni khan an puang a. Premier League champion hian an squad a mi pawimawh a nih hnuah hun rei zawk atan a hma hun hi thlun ngheh an duh.
Kum 26 mi hian kum 2019 khan Atletico Madrid atangin Pound maktaduai 63 leh in City hi a pan a. An tan inelna hrang hrangah vawi 151 a inkhel tawh a, goal 13 a khung tawh.
City-ah hian trophy lian panga a chawi tawh a, heng zingah hian season zawnin Premier League trophy an chawi chu a tel.
“Kum 2019 a City ka zawm kha football ka khelh chhunga thutlukna ka siam fuh ber a ni.”
“Helaia ka inkhelh hnuah hlawhtlinna tam tak kan nei a, hei hi ka chhuang hle. Mahse heng hlawhtlinna kan neih tawhte hian hlawhtlin belh zel duhna min siam a. Vawikhat tem tawh chuan duhtawk a awm thei lo. City hian trophy chawi belh theihna tura hmun tha ber min siamsak.” tiin a cham chhan a sawifiah.