LBS Suzuki Inter Village Football Tournament quarter-final ah inkhel hmuhnawm tak mai vawi hnih en tur a awm a. Lammualah tualchhung football entu mipui an pungkhawm a, an ngaihhlut football khel en tur awm a lungawithlak.
Inkhel hmasa zawkah team tha pahnih Hnahthial Joint VC team leh Lengpui VC team an inkhel a. Football class sang an khel.
Tualchhung football ah an intawn hnuhnung pahnihah penalty hmangin Hnahthial an la chak ve ve a. Tun tumah erawh team pahnih enin chak tur zawk sawi theih a ni bik lo.
An tlarhmaah Jacob Vanlalhlimpuia leh a thlawptu Lalrintluanga te an pawimawh a. Muallaiah Joseph Vanlalhruaia a hmuhnawm thin.
Lehlamah Lengpui in player mimal a hming langsar an nei tha. Captain Joe Zoherliana chu team khaidingtu a ni a, a hnung hokhawmtu Indian football a tawnhriat nei tha F. Lalchhuanmawia a awm. A hmaah F. Lalremsanga pawh an nei bawk.An inkhel ta
Team intluk tawk inkhel an ni a. Khelmual pawn lamah player 12-na ni turin fans an ngah ve ve a, an thawm a ring ve ve.
Coach tha hnuaiah awmze nei a football khelh tum ve ve an ni a, chawlhlawk hma in an fimkhur.
Second half tan hnu lawkah Hnahthial in penalty an hmu a. Joseph Vanlalhruaia’n goal-ah a khung.
Hei hian Lengpui a kaithova, an si phurh sut tuma an insiamrem hnuah an football a hlauhawm a. Goal ban leh cross bar tih per an nei.
Minute 91-naah an mamawh goal an nghak chhuak. F. Lalremsanga chuan penalty an hmuh chu goal-ah a khung a, Hnahthial chak tur a dang.
Extra-time a chak zawk zawn a ni a, Lengpui an phur lakluh. Minute 98-naah an lawmna belhchhah turin Joe Zoherliana’n chakna goal a khung.Champhai Kanan an chak
Inkhel hnuhnung zawkah kumin a team tha tak rawn nei Champhai Kanan VC team leh Aizawl a football thiam veng, engtiklai maha chhe ngai lo Republic Veng te an inkhel.
Republic Veng in tawnhriat nei tha F. Lalrinpuia leh K. Lalnunzama ten bench-ah an dah a. Lehlamah Champhai Kanan in tun tournament a goal 9 khung tawh R. Ramdinthara chu innghah nan an hmang.
Champhai Kanan an tifuh a, minute 3-naah penalty atangin Ramdinthara’n goal a khung a. Minute 16-naah a khung nawn.
Hei hi Republic Veng in halftime dawnah F. Lallawmkima goal leh second half a Aron Vanlalrinchhana goal khung hmangin an sut a. Extra time ah pawh an khung belh loh avangin penalty hmanga chak zawn a ngai.
Penalty-ah hian Champhai Kanan tan Ramdinthara leh Vanramnghaka ten an khung loh laiin Republic Veng tan Lalmuanawma, F. Lalhriatpuia leh F. Lallawmkima ten an khung lova. Champhai Kanan an vannei ta zawk.July ni 12, 2022 Thawhlehni inkhel result :
Quarter-final
12:30 PM Hnahthial Jt. VC 1-2 Lengpui VC (C)
(Joseph Vanlalhruaia 54′,(P) (Remsanga 91′(P), Joe Zohera 98′)
03:30 PM Republic Veng LC 2-2 Champhai Kanan VC (D)
(Lawma Fanai 43′, Aron 71′) (R. Ramdinthara 3′, (P), 16′)
(Penalty Shoot-Out-ah Champhai Kanan VC 4-3 in an chak)
July ni 13, 2022 Nilaini inkhel tur:
12:30 PM Farkawn V vs Sialhawk VC (A)
03:30 PM Armed Veng South LC vs Ramhlun North LC (B)