Gujarat Anti-Terrorist Squad chuan Kutch district-a Mundra lawngchawlh hmun bulah bungraw bawm lian (container) chhungah heroin kg 75.3 zet, Rs. vaibelchhe 376.5 man an man tih Thawhlehni khan thuneitu sang pakhatin a sawi.
Ruihhlote hi thuneitute bum nan puan tumtel (fabric roll) kara dah a ni a, United Arab Emirates (UAE) atanga thawn chhuah niin Punjab-a kal zel tur niin Gujarat Director General of Police Ashish Bhatia chuan a sawi.
Punjab police chuan tun hnai khan Gujarat ATS hnenah hian thla hnih leh a chanve vel kal taa Mundra lawngchawlh hmuna thlen bungraw zingah ruihhlo a awm mai theih thu leh hengte hi Punjab-a kalpui zui tur a nih thu an hrilh niin Gandhinagar-a thuthar lakhawmtute a kawmnaah Bhatia-a chuan a sawi.
“Thu dawn bawhzui hian Punjab police sub-inspector hovin Gujarat ATS team hian Mundra an pan a, lawngchawlh hmun bul lawka Container Freight Station-ah rinhlelhawm tak hi an hmu ta a. Bungrua hi UAE-a Ajman Free Zone atanga thawn, May 13-a Mundra thleng a ni,” a ti.
Ngun taka an dap hnuah fabric roll 540 zet dahna container-ah ruihhlo hi an hmu a, roll 64 kara dah a nih thu a sawi.
“Puante chu lehkha khawng (cardboard) hmanga siam pipe mumah tel a ni a. Ruihhlo thawntute hian plastic pipe lian zawkin cardboard pipe hi tuamin a inkarah ruihhlo hi an zep ta a. Carbon tape hmangin uluk taka char leh niin X-ray check-ah pawh hmuh mai theih a ni lo,” a ti.
ATS-in heroin an man hi kg 75.3 zet, Rs. Vaibelchhe 376.5 man zet a nih thu Bhatia chuan a sawi.
He thilah hian tumah man tel erawh an la nei lo.
Container hi UAE-a Green Forest General Trading-in an thawn chhuah niin West Bengal-a hmunpui nei, delivery agent pakhat, Jovial Container Lines chuan Kutch-a Gandhidham-a an pisaah an lo dawng a ni tih a sawi.
Mundra lawngchawlhnaa thuneitute hrem lohva an chhuah chungchangah Bhatia chuan lawngchawlhna pakhat mai burbun chin a ni lo tih a sawi.
“Ruihhlo tawlhtute hian India-a thawn tur hian kawng an hmuh remchang ang ang an hmang mai a. Mundra chauh a ni lo, Gujarat-a Kandla leh Pipavav-ah pawh tun hnaiah kan man tawh a. Nhava Sheva port, Maharashtra, Chennai leh West Bengal-ah pawh man a lo ni tawh,” a ti.
Bhatia hian Gujarat lawngchawlhnaa thawn ruihhlote chu an man deuh zel thu a sawi a, state police leh agency dangte a fak bawk.