July 19, 2022-a India president thlanna neih tur chungchangah nimin khan ARO & Presiding Officer H. Lalrinawma, Mizoram Legislative Assembly Commissioner & Secretary ni bawk chuan thuthar lawkhawmtute a kawm a. Mizoram inbuatsaih dante leh inthlan kaihhnawih chungchangte a sawi fiah.
Assembly House Committee Room-a inkawmnaa H Lalrinawma sawi danin president thlanna hi chawhma dar 10 atanga tlai dar 5 chhung neih tur a ni a, Mizoramah chuan Mizoram Legislative Assembly main building committee room-ah neih tur a ni a. Vote hi tun thla ni 21-ah Returning Officer Office Room No. 63, First Floor, Parliament House, New Delhi-ah chhiar a ni ang.
ARO & Presiding Officer H Lalrinawma chuan India ram president thlanga vote thlak thei tur hi ram pumah elected MLA 4,033, Lok Sabha MP 543 leh Rajya Sabha MP 233, an vaiin mi 4,809 an awm a, an vote hlutna belhkhawm hi vote 10,86,431 a nih thu a sawi a. Mizoram MLA-te vote hlut zawng tur chu pariat theuh a nih laiin, MP-te erawh an vote hlut zawng inang vekin MP pakhat vote hlut zawng hi 700 a nih thu a sawi.
Mizoram MLA leh MP zingah hri kai avanga India president thlannaa vote thlak thei lo tur an awm lo tih sawiin H Lalrinawma chuan, “Covid-19 darh leh mek avangin fimkhurna taka vote thlak hi kalpui tur a ni a. Tun dinhmunah hri kai avanga Mizoram MLA leh MP zingah vote thlak thei lo tura in-report an la awm lo a. Member-te zingah hri kai an lo awm palh a nih pawhin ECI-in a nawlpuiin vote an thlak zawh hnuah a hranpaa vote an thlak theih nan ruahmanna siam a ni ang,” a ti.
Ballot paper hmanga vote thlak a nih tur thu leh ballox box pawh ECI ta hman tur a nih thu sawiin H Lalrinawma hian, MP-te chu Parliament House-ah vote thlak tura ngaih an ni a, MLA-te chu mahni state assembly house-ah vote thlak tura ngaih an nih thu a sawi a. Eng emaw tul avangin Delhi leh state dang headquarters-ah vote thlak phalsak theih an ni a; amaherawhchu, returning officer hnenah inthlan ni hma ni 10 tala dilna thehluh tur a nih thu a sawi bawk.
ECI atang ballot box, ballot paper leh a kaihhnawih lehkha dangte la turin Joint Chief Electoral Officer leh Deputy Secretary, Mizoram Legislative Assembly Secretariat an kal thu leh Indigo Airlines hmangin Ningani hian Lengpui Airport thlenpui a ni ang a, police venhimna hnuaiah Assembly House-a strong room-ah dah a ni ang a, darkar 24 chhung police-in an veng dawn tih a sawi.
July 19, 2022 hian vote thlakna ballot box leh lehkha pawimawh dangte chu Assistant Returning Officer-in returning officer hnenah thehlut tura ECI-in a tih angin officer pakhat hruaiin venhimna hnuaiah Returning Officer Office, Parliament House-ah a dah let dawn tih a sawi a. Mizorama India president thlanna buaipuitu turte pawhin inbuatsaihna tha tak an neih tawh thu a sawi lang bawk.
Kumina presidential election hi a tum 16-na tur a ni a. Presidential election, 2022-ah hian contesting candidate pahnih - Droupadi Murmu Baidaposi, Odisha leh Yashwant Sinha, Noida, Uttar Pradesh te an awm a ni.