Aizawl: January-June, 2021 chhung khan Aizawl district police-in thubuai 1,143 an ziah luh zinga 630 (55.12%) chu rukruk thubuai a ni a, kumina hemi hun chhung veka thubuai an ziah luh tawh 1,294 zinga 919 (71.02%) chu rukruk thubuai a ni a, nikum aiin rukruk thubuai an ziah luh hi a pung nasa hle a ni.
Nimin khan Aizawl district-a police officer-ten Conference Hall-ah Crime Review Meeting an nei a, he hunah hian rukruk thubuai ziah luh hi kuminah a pun zawk thu tar lan a ni.
Nikum January atanga June 30 chhung aiin kumin January atanga June chhunga Indian Penal Code (IPC) thubuai an ziah luh chu 272 (zaa 12.77)-in a pung bawk a, local laws leh special laws hnuaia thubuai an ziah luh pawh 151 (zaa 6.20)-in a pung bawk.
Aizawl district chhunga police station pakuaah Aizawl Police Station-in thubuai ziah luh an ngah ber tawh a, thubuai 462 an ziak lut tawh a, a dawttu, Bawngkawn Police Station-in thubuai 454 ziak lut tawh bawkin thubuai ziah luh tlemna ber, Sakawrdai Police Station-ah thubuai panga chauh ziah luh a la ni.
Crime Review Meeting-ah hian Aizawl DEF hnuaia officer, Addl SP, SDPO, OC leh officer dangten kumin June 30 thlenga an bial chhunga thubuai ziah luh dan dinhmun an thlirho a, police officer-te tan infuihtharna hun hman a ni bawk. Crime Review Meeting hi vawiinah neih chhunzawm ani ang.