Aizawl : Adviser, NEC & Nodal officer for vibrant villages of Mizoram R. Lalrodingi’n Thawhtanni zan khan Kawrtethawveng ah khaw 13-a VCP te a kawm a. Vibrant village chu central sorkar hmalakna a nih thu sawiin, border area-a cheng mipuite harsatna a taka hmuhpui tura tirh a nih thu a sawi.
Vibrant village programme-in a duh angin zan khat tal border area riahchilha, mipuite khawsakphung dik tak zir chiang tura kal a nih thu leh a tul anga report leh rawtna NITI Aayog a thlen tur a nih thu Lalrodingi chuan a sawi a. Vibrant village-in a tum leh kalphung turte sawifiahin, vibrant village atana thlan VCP ten kawng hrang hranga an khaw dinhmun te an sawi theuh bawk.
VCP ten harsatna hrang hrang an sawi te chu a sutkian dan tur leh hmalak dan turte sawihovin an inkawhhmuh a. mipui hmasawnna tura sorkar scheme hrang hrangte lo zirchianga, a nih dan turin kalpui a ni em tih lo chik lehzual theuh turin VCP te chu a chah bawk.
Mizoram sorkara Sr. research officer, planning & programme implementation department C. Lalnunsiami pawhin sorkarin scheme hrang hrang a kalpui mekte sawifiahin, khawtlang hruaitu VCP te chu an mawhphurhna hrang hrang te a hrilhfiah bawk a ni.