Aizawl: Mizo Students Union (MSU)-in nimin khan Vanapa Hall-ah Mizoram Univeristy hnuaia graduate, Mizo topper-te chawimawina hun an buatsaih a, he huna khuallian Chief Ninister Zoramthanga chuan, “Ruihtheihthil te, zuk leh hmuamte hian mi a nih theih ang ni thei lovin a siam fo thin,” a ti.
Mizo topper 24-te chawimawina hun, MSU Finance Secretary Zodinsanga kaihhruaiah hian Zorama chuan ruihtheihthil avanga miin a nih tur ang an ni thei thin lo chu veiawm a tih thu a sawi a; zirlai kalkhawmte chu zuk leh hmuam leh ruihtheihthila fihlim tlat turin a chah.
Zirna pawimawh thu sawiin, “Zirna hi eizawnna kawngah chauh ni loin, mihring pangngai, mi zahawm leh rawntlaka min siamtu a ni,” a ti.
Chief minister chuan hlawtling turin mahni in theihnghilh a, mi dang tan hnathawh leh dawhtheihna a pawimawh thu a sawi a, “Kan nih theih leh kan thlen theih thleng tur chuan thui tak mahni kutah a awm,” tiin a sawi.
Mizoramah hmasawnna tur hai chhuah tur tam tak a awm thu te, haichhuak thiam leh a nachang hria apiang tan vanneihna leh ram hmasawnna pawh chumiah chuan a innghah dan a sawi bakah, thalai mi thiamte chu ram hmasawnna atan an pawimawh thu a sawi bawk.
Graduate topper chawimawina hunah hian MSU President J. Lalmuanzuala leh he programme Uaptu John Lalpeka ten thu an sawi bawk a ni.
Chawimawina an pek zirlai 24 zingah hian Pachhunga University College atangin zirlai 14, Govt. Hrangbana College atangin zirlai pali, Govt. Zirtiri Residential Science College atangin zirlai pathum bakah Govt. T. Romana College leh HATIM atangin zirlai pakhat ve ve an lang a ni.