Sri Lanka ram parliament chuan July 20 hian an ram president thar tur an thlang dawn tih speaker chuan a puang a. Nilainia bâng tur, President Gotabaya Rajapaksa thlaktu tur a ni ang.
An ram mipuiten eibar dinhmuna an chhiat lutuk avanga thinrimin president leh prime minister chenna an luhchilh hnuah Thawhtanni khan president thar thlan hun tur hi puan a ni.
Parliament-a member 225-ten inthlan hi chuhin an hming an pe lut thei ang a, July 19 thleng inpek theih a ni.
A tukah vote thlak nghal tura ruahman a ni tih Speaker Mahinda Yapa Abeywardena chuan a puang a, hei hi Thawhtannia politics hruaitute nena an thutkhawmnaah an duan a nih thu a sawi.
“Vawiina party leader-te thukhawm chuan kan ram danpuiin a phal chinah party tin telna sorkar din ngei a tul tih an pawm tlang a ni,” tiin Abeywardena chuan a thuchhuahah a tar lang.
“Rorel lai party chuan prime minister leh cabinet chuan all-party government din turin bân an inpeih reng tih an sawi bawk,” a ti.
President Rajapaksa hi defence secretary a nih laia Tamil Tigers helho a chhut chimih avanga ngaihsan hlawh a ni a. Kum 1948 hnua an ram eibar dinhmun hniam lai ber tawnga tuialhthei, ei tur leh ni tin mamawh dang an tlakchham tan mek laiin a unaute leh a chhungkhat lainate chuan minister an nihna atangin an lo bânsan tawh hlawm.
Mipui thinrimin a mi malin an halsak, Prime Minister Ranil Wickremesinghe chuan Rajapaksa hi a bâng dawn tih a lo sawi tawh.
A pisa chuan Rajapaksa hian a bân tur thu hi prime minister hnenah thlenin party tin telna sorkar din tura inpeih a nih veleh a cabinet-te nen an bâng nghal dawn niin a sawi.
Thliarkar rama chengte hi an sawi lawk anga Nilainia president leh prime minister an bâng lo a nih chuan Ninganiah ram pumah anmahni duh lohna lantir tumin an inkau sa mek.
Sorkar duh lohna lantirnaa an hruaitute chuan Colombo-a president leh prime minister chenna in an luah mek chu an bân ve ve tak tak hma chuan an luah rih dawn tih an sawi bawk.
Inrinnia mi pawimawhte in an luhchilh hnu, an luah chhunzawm mek lai hian Thawhtanniah kha chuan boruak duhawm lo a thleng zui lo va. Mipuite chuan president secretariat leh a chenna bakah Britain-in a awp laia din tawh inte chu an fang a, police-te pawhin dan an tum bik tawh lo.