India rama COVID-19 darh thar leh mekah Tripura-ah chuan a kai tih finfiah tawh mi 37 chu an chin hriat lohvin an awm mek.
Tripura State Disease Surveillance Officer Deep Kumar Debbarma chuan, “Covid kai mi 37 chu an chin hriat lohvin an awm mek a. An inendik laia department hnena an contact number an pek chu an hman loh leh biakpawh theih loh (reachable) a ni,” tiin a sawi.
Hetih lai hian Tripura sorkar chuan Thawhlehni atanga hman tan tur khan Covid-19 darh thar leh mek thunun nan hmai tuam vek tura tihna thupek a chhuah.
Thla riat thla kua vel zet hri kai hmuh an tlakhniam tawh hnuah tunah hian a kai hmuh an pung thar leh mek a, hei hi thawh lina anga sawi mek pawh a ni mek.
Tripura sorkar hian mipuite hmai tuam tura a tih thar leh bakah hian Covid darh lohna tura khawsak dan tur zamte zawm tha tur leh a nawlpuia endik (mass testing) pawh mi tamna laia kalpui turin a ti bawk.
“Chawlhkar khat liam ta chhung khan hri kai mi 131 hmuh chhuah thar leh a ni a, hei hi a nih dan thin pangngai aiin an tam hle a ni,” tiin Tripura State Disease Surveillance Officer Deep Kumar Debbarma chuan a sawi.
Thawhtannia chief secretary kaihhruaia Civil secretariat-a state level task force thukhawm chuan hripui a darh leh mek thunun tur hian inkhuahkhirhna khauh zawk kalpui thar leh ni se an ti a ni.
Debbarma chuan, “Mass testing kan nei ang a, hei hian kan nihna dik tak a tar lang ang a, ke kan pen leh zelna turah pawh kawng min kawhhmuh dawn a ni,” a ti.
Tripura-ah hian Thawhlehni tlai thleng khan hri kai enkawl lai zinga mi 131 chu damdawi ina awm niin mi dangte chu ina inenkawl an ni.