- Rinfela Zadeng
Politics hi sawi loh theih a ni lo a; Pathian thu kan awihna rah lanchhuahna pawh ram rorlena – politics-ah hian a ni lo thei lo a. Thuthlung Hlui huna zawlnei tam tak te rawngbawlna pawh kha, ram leh hnam enkawtu, sorkar roreltute tih dik loh siam that leh sawisel te, thupek leh vaukhan te a ni tih chiang takin kan hmu a. Kristian kan nihna lanchhuahna tur langsar ber pakhat pawh kan ram rorelna khawlah hian Pathian thu kan awih em tih hi kan in tehna tur a ni.
An tling dawn chuang lo
Tun Mizoram khawvela politics thila kan buaina langsar ber leh a laimu chu – kum 40 chuang sorkarna lo siam tawh party mi leh sa ni lo te chunga rinna kan nghat ngam lo hi a ni. Ram leh hnam siam that duh, mi tha tak tak leh mi dik tak te pawhin ke pen tumin politics an lo luh chilh a. Mipuite rilru an tehna atangin party lian sa, ngelnghet zawk leh hlun zawk an bel zel a. Mahse chu mi rah chhuah chu – tuna kan din hmun hi a ni. Party te zawk, independent leh hmel thar hmanga ram siam that tura politics khelh tum chu kan ngam lo a. Mipui pawhin ‘an tling dawn chuang lo’ tih rilru puin mi tha zawk hnawlin, politician hlun zawk, party hlun zawk te bawk kan thlang tling a. Chumi rah tha chhuah chu a taka hretu te kan ni.
Party lian leh hlun kan sawisel lo
Hetia kan sawi avang hian Party lian leh hlun kan sawisel reng reng lo a; ram hruaitu hlun, mi tha leh rintlak tak tak te pawh kan sawisel reng reng lo. Kan sawisel zawk erawh chu – heti chen Mizoram an enkawl tawh leh an enkawl mekah hian kan lungawi lo hi a ni ber zawk. Chu chu ram leh hnam hmangaih tak taktu thalai, thangthar lungfing zawkte hian thlakdanglam hi kan duh tawh a ni. Khawii party a mi pawh, mi tha leh dik hi chu kan ram rorelna fawng chelh tur hian kan thlang tling zel duh. Kan duh loh zawk erawh chu – mi tha si lo, hei leh chen ram lo kaihhruai tawh, hmasawnna min thlenpui thei si lo te hi an ni. Kan ram Chief Minister meuh thusawi apiang kan nuih zat laklawh tawhte hian kan ram politics dinhmun a tarlang thui hle awm e.
Kan huaisen a ngai
A tira kan sawi tawh ang khan, an tlin kan rin zawh loh vang ringawtin mi tha tak tak te kan hnawl a; party lian mi leh sa, tha kan tih loh te bawk kan thlang tling leh a. Chuvangin mi tha tak tak, ram hruaitu nih duh te pawhin mipui rilru milin party lian sa an bel a. Mahse an mahni ngawt chuan tihtheih an nei tak tak ngai lo. Chuvaing mipuite hian eng party mi leh sa pawh, independent-a ding te pawh, mi tha chu vote ngam turin i huaisen ang u. Aam Aadmi Party te pawh kum 2012, November thlaah a ding chauh a; mipuite’n huaisen taka thlawpin vawiinah chuan India rama Cheif Minister tha ber pawl chu Delhi khuan an neih phah tih kan hria. Danglama, ram siam tha turin i huaisen ang u.
Kan danglam ngei ang
Mizoram politics that loh dan leh a beidawnthlakzia hi hretu hi mi tam tak kan awm tawh a. Chutih rualin party politics ruihchilh tlat, ram siam tha tur ni lo, party mi leh sa thlan tlin ngei ngei duh mi tam tak kan la awm bawk. Chumi te pahnih chu vawiinah hian kan insual mek a, kan inhruipawh mek a ni. Party Politics hmanga ram siam that tumna lam chu a beidawnthlakzia hretute hian, ram leh hnam hmangaihna politics hmanga ram siam that tumin tan an la mek a. Chumi te chuan hnehna an chan hun hunah Mizoram hian hmel thar a hmuh ngei a rinawm. Mahni inhaivura politics khel, ram leh hnam hmangaih tak tak lo ram hruaitute hi kan vote hmanga kan namthluk ngam hun hunah Mizoram hian hmasawnna a hmu anga; Kristian ram kan nihna dik tak pawh hi a lo lang ang.
Party politics ringawt khela ram leh hnam siam that kan tumna hi a hlawhchham chiang lutuk a ni tih hi hre rengin; kan ram leh hnam alo dinchhuah ve tak tak theihna turin nang leh kei hian huaisen takin mi dik leh tha, ram leh hnam hmangaih tak taktute kuta kan ram rorlena hi a awm theihna turin i danglam ngam teh ang.