Leeds United forward Raphinha chuan Barcelona a pan dawn a. Club pahnihten inremna an neih thu an sawi chiang tawh.
Kum 25 mi Brazilian playmaker hi Barcelona hian Euro maktaduai 59 in an lei dawn a, a khelhdan a zirin Euro maktaduai 65-ah a la chho thei.
Club pahnihte hian player insawnna tur hian inremna an nei tawh a, player in medical a neih fel hunah a insawnna hi tihchian a nih tur thu an sawi.
Elland Road a season hnih a hman chhungin Raphinha hian Premier League game 65 khelin goal 17 a khung a, midang khung tur vawi 12 a siamsak.
Leeds head coach Jesse Marsch chuan an player chhuah tur thu hi a sawichiang tawh a. “A tan he inremna hi a fel thuai ka beisei a, a chhan chu Barcelona a khelh hi a duhthusam a ni thin.” tiin Australia a pre-season tour an neihna a hruai a nih ve loh hnuah a lo sawi tawh.
Premier League club te pawhin an ngaihven Raphinha hi Chelsea a insawn mai tura ngaih a ni hman a. Nimahsela player in Spain pan a duh avangin club lamin a duhna an zahsak a, Barcelona in Chelsea ngamna ang zata an ngam ve theih hun tur an nghahsak.
Anni bakah hian Arsenal leh Tottenham Hotspur te nen pawh sawizawm a ni hman.
Raphina hian kum 2020 khan Pound maktaduai 17 in French club Rennes atangin Leeds United hi a zawm a. Marsch chuan ani hralhna bakah midfielder Kalvin Phillips hralhna atanga sum an hmuhte chuan an team hi hmalam pana ke an penna tur kawngah nasa taka a pui ngei tur thu a sawi tel ve bawk.