Kan khawtlang nun siamthat chhoh a ngai tak zet
Kan ramah sualnain bu a khuar thuk zel a, kil hrang hrang atangin thuhriat nuam ni lem lo a richhuak nawk nawk zel ta bawk. Famkim lohna khawvela awm kan nih miau avangin famkim nih zawng a har ngei ang, mahse sualna kawnga kan kal zel loh nan hian inzirtir leh inven hi kan ngai nasa ta khawp mai.
January-June, 2021 chhung khan Aizawl district police-in thubuai 1,143 an ziah luh zinga 630 (55.12%) chu rukruk thubuai a ni a, kumina hemi hun chhung veka thubuai an ziah luh tawh 1,294 zinga 919 (71.02%) chu rukruk thubuai a ni a, nikum aiin rukruk thubuai an ziah luh hi a pung nasa hle a ni.
Hei hi kan dinhmun thar lam ber a ni. Rukruknain nasa taka bu a khuar ta maite hi a damdawi kan zawn a va ngai em. Kan ram hian dinhmun duhawm lo a tawh zel hmain a siamthat hna hi tun atangin i thawk ang u.
Heti reng kan nih chuan nunau mai ni lo, patling hi ralmuangin a la awm lo chho thuai dawn. Kan khawtlang nun siamtha turin theihtawp chhuah ila, sorkar pawhin a ram mipuite thlamuan turin kil hrang hrang atangin hna thawk mawlh teh se.