Team 204 telna tournament, Mizoram hmun hrang hrang atanga football inelna lian inkhelin a hmawr bawk a hnaih zel a. Final luh inchuhna kal zelah quarter-final chu Nilaini khan khelh zawh a ni a. Inkhel boruak a sang.
Inkhel hmasa zawkah tan leh ngaihven hlawh Sialhawk VC in Farkawn VC team an hneh a, chak turin extra-time an mamawh.
Inkhel hnuhnungah boruak a sang a. Referee thutlukna avanga sawizui hlawh takah 2-1 in Ramhlun North Local Council team in Armed Veng South Local Council team an hneh.Sialhawk an la tlo
Kumin LBS Suzuki Inter Village Tournament a che tha Sialhawk in an star player R. Laldanmawia hovin an rawn inlan leh a. Pawn lamah an fans te an thu pawl phut bawk.
Danmawia hian tun tournament ah goal 9 khung tawhin a skill bakah khelmual chhungah player-te a ho khawm thiam. Ani bakah striker Rotluangliana’n goal nga a khung tawh a. Quarter final thleng hian goal khat chiah an la chhuah.
An khingpui Farkawn pawh fans an nei ngah ve thova. Team tha rual tak, player langsar lem lo an ni hlawm a. Kolasib Jt. VC, Diakkawn hneh theitu an ni.
Inkhel tan atangin chak tura rinkai zawk an awm nghal a, Sialhawk in goal nawr an tum. Nimahsela an tum angin football an khel bik lo. Farkawn in a hnung remkhawng a, rang taka chhut let thin an tum a. Ball vawrh pawh an hreh lo.
Hei vang hain Sialhawk in football hlauhawm an tum dan angin an khel bik lova, ball kanga inpek an ngah ve phah.
Chance mumal a tam lo chungin minute 21-naah goal a lut a, Sialhawkin Lalmuankima hmangin hma an hruai. An lawm erawh a rei lo, Farkawnin minute 28-naah Lalrinpuia hmangin an sut.
Sialhawk tan Vanlalbiakdika chuan minute 35-naah a khung nawn a. An hum tluan tawh mai dawn nia lang hmanin second half-ah pawh goal a lut lawk lo. Mahse Rinpuia bawk inlarin minute 81-naah an si phurh a sut.
Extra-time ah erawh Sialhawk an chungnung zawk a. Rotluangliana’n an goal thumna a khung nghal thuai hnuah Vanlalduata’n minute 118-naah an hnehna tichiang turin goal li na a khung.An buai nuai nuai
Inkhel hnuhnungah inkhel enkawltu referee thutlukna avangin sawizui a tam a. Inkhel zawh dawnah buaina a chhuak. Nimahsela hei hian Ramhlun North hnehna chan a hliahkhuh lova, 2-1 in Armed Veng South an hneh.
Armed Veng South in goalkeeper laka foul avanga first half a goal pawm loh an neih hnuah second tan tirah K. Lalrosanga’n Ramhlun North hma a hruaipui a. Armed Veng South in an lama ball let thut an veng zo lo.
Minute 73-naah Lalrammuanpuia hmangin an sut a, an football a mawi. Mahse an lawm rei lova. An thah leh chiah tihin V. Lalchhuanawma’n chakna goal a khung a, center atanga pet nachang hria in goalkeeper R. Malsawmkima a talbuai a, a goal.
Inkhel tawp lamah Armed Veng South in minute 88-na leh 90 pelh tawhah zing takin penalty beiseina an nei a. A hnuhnung zawkah Ramhlun North defender in Armed Veng South forward Lalnunsanga a titlu chiang.
Foul a ham lo chu, first half lama an goal pawm a ni tawh lo nen, a hma lawka thutlukna an hmu lo nen Armed Veng South player te an inthunun zo lova. Referee an bawr. Tawnhriat nei tha tawh pathum - Lalnunsanga leh Lalhmangaihsanga ten referee hmai zawnah tawngkam an nei a. Laldinliana Renthlei in referee chiang takin a su thlu.
Referee hian official dangte nen an inrawn hnuah hremna hran khelmualah a pe lova. Lalnunsanga chu yellow card a pe a, inkhel a zo. Inkhel zawhah erawh mipui lawm lo khelmual sirah an chambang rei hle.July 13, 2022 Nilaini inkhel result:
Quarter-final
12:30 PM Farkawn VC 2-4 Sialhawk VC (A)
(Lalrinpuia 28′, 81′) (Lalmuankima 21′, Vanlalbiakdika 35′, Rotluangliana 92′,
Vanlalduata 118′)
03:30 PM Armed Veng South LC 1-2 Ramhlun North LC
(Lalrammuanpuia 73′), (K. Lalrosanga 48′, V Lalchhuanawma 74′).