Congress thalaiin July 13, 2022 chhun dar 12 ral hmain Lalhriatpuii chhungte hnenah zangnadawmna pe turin sorkar phut mah se tih hlawhtlin a ni lo a, hemi bawhzui hian nimin chawhnu khan secretariat tualah an pungkhawm a; sorkarin zangnadawmna a pek hma chuan an hmalakna an chawlhsan an tum lo.
Excise & Narcotics department-in May 27, 2022-a Millenium Centre-a grape wine an mansak zinga mi, Lalhriatpuii, Dawrpui Vengthar chu July 11, 2022 khan a boral a, he thihna thleng chungchangah hian sorkar chu mawhphurtuah Congress thalai chuan puhin, July 13, 2022 ral hma ngeia zangnadawmna Rs nuai 100 pe turin sorkar an phut a, July 12 khan an phut lehkha chu Excise Minister Dr K Beichhua hnenah an theh lut.
An hunbi tiam a ral hnuah pawh sorkarin Lalhriatpuii chhungte hnenah zangnadawmna a pek tur thu emaw, a pek thu emaw thu dawn an neih loh avangin nimin chawhnu dar 12:30 vel atang khan Congress thalaite hi secretariat tualah an pungkhawm a, zangnadawmna pek ngei an phut thu te, chu chu tihhlawhtlin a nih loh chuan excise minister bâng tura an phut thu te an au chhuahpui a ni.
Congress thalaite an pungkhawm dawn tih hre lawkin Mizoram police thahnem tak chu Aizawl SP hovin nimin chawhma lam atang khan secretariat tualah hian an duty a, boruak duhawm lo thleng a awm lo.
Mipui thlavang hauha inngaia pungkhawmte hian an thil phut chungchanga sorkar thuthlukna hrilh hriaa an pisa atanga an awmna hmun pan turin Excise Minister Dr. K. Beichhuaa emaw, a private secretary an phut a. Darkar khat chuang an nghah hnuah tlai dar 3:35-ah a PS chhuakin gate kiangah an inhmu a, minister dawhkana inbiak an duh thu an sawi a; mahse, Congress thalai hian thu phut an neih a hriat vek tawh avangin amah minister ngei lo chhuak turin an phut thung.
An koh ber an nghah chhuak tak lawk loh avangin Congress thalaite chu tlai dar 4 vel khan an tin darh a, hemi hnu hian Congress thalai hruaituten an hmalak zel dan tur an rel chhunzawm a ni.
He an punkhawmnaah hian MPYCC President Dr. Lalmalsawma Nghaka chuan thu sawiin Lalhriatpuii chu grape wine Rs nuai 22 chuang hu mansak a nih avang leh dik lo taka zu zuar anga puh a nih avangin rilru hah taka awmin stroke a neih phah a, a boral ta hial tih a sawi.
Sorkar chu dik lo taka Hriatpuii te chhungkua an puhna avanga ngaihdam dil tur leh zangnadawmna pe turin an phut tlat tih sawiin, an thil phut a hlawhtlin hma chu hmalak chhunzawm zel an tum thu a sawi a, he thihna hi politicise an tum loh thu leh chutihrual chuan sorkarin dik lo takin a ti a, an tu leh fate khawtlang pawhin zahawm taka an en leh theih nana ti an nih thu a sawi bawk a ni.