Tripura-a co-operative society-in thingpuife siamna, tea factory a neih atanga mihring kut ngeia buatsaiha tel (hand-rolled orthodox tea) chu ram pawn lam, Gulf leh Denmark-ah thawn chhuah tan a ni ta.
Hetianga thingpui buatsaih (tea variety) hi Tripura atanga hralh chhuahah chuan a man to ber nia hriat a ni a, kg khat Rs 12,500 man zet a ni.
Tripura Tea Development Corporation board of directors member Diganta Barman chuan kuta an siam thingpui hi Amritsar, Punjab-a awm company-in Denmark lama thawn chhuah turin an leisak tih a sawi.
“Tripura thingpui hian ram puma hriat a hlawh piah lamah khawvel huap pawha hralh chhuah tlak a nihzia tihlan mek a ni a. A tui dan chi hrang hrang leh a danglam bikna hian khawi lai bazarah pawh hralh a tla thei vek a ni,” tiin ETV Bharat chuan Barman-a thu sawi an tar lang.
Barman chuan an thingpui thawn chhuah hi Tripura atanga thawn chhuahah chuan a to ber a ni tih a sawi a. Tun hmain Rs. 10,000 man vel chu a awm thin a, tuna mi erawh Rs 12,500 man zet a ni.
Thingpui hi Pancham Nagar tea factory, Kailashahar bul, Unakoti district-a co-operative society pakhat enkawl atanga siam chhuah a ni.
Society hian sorkar factory hlui chei thain thingpui tha leh tui tak, Neermahal tea an tih chu an siam chhuak.