Boyband lar vanglaia ‘ber’ ni hiala sawi thin Backstreet Boys chuan DNA World Tour an kalpui mekah Noblesville, Indiana-a show an neih laiin tlar hmalama awm hmeichhe pakhat chu a talbuai nia hriaiin member te hian zai an chawlhsan lailawk.
Ruoff Music Center-a a inlannaah Nick Carter, Howie Dorougth, AJ McLean, Brian Littrell leh Kevin Richardson te chuan, ‘That’s The Way I Like It’ hla an sak laiin, an hmuh phak maia ding hmeichhe pakhat chu rikrum thila buaipui ngai nia lang thei tura a talbuai mek chu hmu fuhin, rang taka inberawn nghalin, show an titawp.
McLean chu penchhuak hmasa ber niin, music leh lam lai titawp tura a ngen hnuah hmeichhe awmna lam panin thil awmdan a enfiah. Damdawi hmanga enkawl ngai nia a lan vangin wheelchair hmanga nawr a ni a, pawn lam chhuahpui a nih hnu hian a harhchhuak nia sawi a ni.
Backstreet member te hian zai leh music kalpui nghal vut vut mai lovin, fan te hmaah ‘Are You Ok?’ tiin an ngaihsakzia an lantir leh a, tichuak dan pangngaiin show an nei chhunzawm nghal.