Europe khawmualpui hmun hrang hrang chu khaw lum uchuak takin a tuam mek a, buaina a thlen mek.
Spain leh Portugal-ah chuan rei tak ruah a sur tawh lo va, ram a kang mek a. Khaw lum rumrut chuan France leh UK pawh a tuam ve tan mek.
France leh Spain-ah chuan Ningani hi a lum ber hun tur niin an sawi lawk a. France chuan an national day-a halmawi an hal thin chu kangmei chhuak thei ven nan an thulh fel tawh.
Sik leh sa inthlak nasa avangin khaw lum hi a na telh telh a, a rei telh tel a, sawi lawk pawh a har telh telh bawk a. Khawvel pum hi chawhrualin industrial era hun lai aiin 1.1°C chuangin a lum tawh zawk niin mi thiamte chuan an sawi.Spain hmar lam a lum uchuak!
Khaw lum uchuak tak hian an ram pum a tuam mek a. Nipui laia a lum ber ang an tawng chho mawlh mawlh a, a bikin chhim lam leh a laili lamin an tuar nasa zual.
Khaw lum tuar fo tawh thin - Andalusia, Castilla La Mancha leh Extremadura velah chuan tun karah hian 40°C a hawlh deuh reng a. Hetih lai hian hmar lam, khaw lum tuar lutuk ngai lote pawhin an tuar ve mek a, hmarthlang lama Galicia pawh inralring tura tih niin Miño phaikuam phei chu 42°C vel ni thei dawnin an sawi lawk.
Region dang 13-te pawh khaw lum lo thleng tura inralrinna sang ber lo deuh, orange emaw, yellow emaw pek an ni hlawm.
Zirtawpni thleng hian hmun thenkhat chu a la lum dawn tih sawi lawk a ni a. Hmarchhaka Zaragoza khawpuiah chuan 42°C a kai dawn a, chhimthlanga Badajoz-ah phei chuan Ningani hian 47°C a tling thei hial dawn niin an sawi.
Hmar lamah chuan khaw lum avangin boruak pawh a bawlhhlawh hle a. Khaw lum lutuk avanga damlohna thleng thei a nih avangin mipui pawh fimkhur tura tih an ni a, chawhnu lamah phei chuan kawtthlerah mi hmuh tur an tam lo hle.
Khaw lum uchuak tak hian kartawp a thlena kar thar a kai a nih chuan khaw lum an tawrh rei ber tum an thleng thei dawn a ni.