AIZAWL: Larsap Hari Babu Kambhampati-a’n nimin khan Gorkha hlaphuah thiam, Gorkha te tana ziak leh chhiar leh hnam hmasawnna kawnga thawhhlawk tak, thu leh hlaa miril Adi Kavi Bhanu Bhakta Acharya piancham vawi 208-na lawmna Mizoram Gorkha Youth Association (MGYA) huaihawt chu Vanapa hall-ah a hmanpui.
Larsap chuan Bhanu hnathawhte leh a sulhnute chu Gorkha te tan a hlu tih sawiin, Sanskrit atanga Nepali tawnga Ramayana a lehlin hnuah Nepali tawngin nasa takin hma a sawn phah niin a sawi a. Tunah chuan Nepali tawng chu India danpui chhunga 8th scheduled-ah sorkar hriatpui tawng hrang hrang zinga pakhat a nih tak thu a sawi.
Gorkha te chu khawvel ram hrang hrangah awm darh mahse, an awmna hmun apiangah midangte nen inrem takin an chengho thei zel nia sawiin, hei hi an ropuina a nih thu Larsap chuan a sawi a. "Mizoramah pawh Gorkha te chu rei tak lo awm tawhin Mizote nen inngeih takin tun thlengin an cheng hova, he inunauna leh inremna lawmawm tak hi chhawmnun zel a nih theih nan Gorkha thalaite pawhin vantlang tana luanchhuah leh hna tha thawh kawngah theihtawp an chhuah zel a tul a ni" a ti.
Larsap chuan Gorkha te chu Mizoramah hnam tlem zawk, mi singhnih vel chauh ni mahse, Mizoram hmasawnna atan chuan tih theih leh theihna sang tak nei nia a hriat thu a sawi a. Hnam tlem zawk an nih avanga engemaw harsatna an neih theih ang te pawh lo zirchiana, siamrem ngai lai te pawh sorkar thuneitute lo sawipui a tum thu a sawi bawk.
Adikavi Bhanubhak- ta Acharya hi Nepal rama Tanahu district-a Chundi Ramgha khuaah kum 1814-ah a piang a. Puithiam chhungkua an nih avangin a hranpain sikul kal lo mahse, a pa zirtirna avangin ziak leh chhiar lamah a thleng sang hle a. Thu leh hla lamah sulhnu hnutchhiah tam tak nei mahse, khawvelin a hriat larna ber chu Hindu Sakhaw lehkhabu thianghlim, ‘Ramayana’ Sanskrit tawng atanga Nepali tawng-a a lehlin kha a ni. Gorkha hnahthlak hnam hrang hrang te inkara inpumkhatna siamtua ngaih niin, kum 1868-ah a thi a ni.