Aizawl : Lawngtlai bawrhsap Amol Srivastava hovin nimin khan Lawngtlai khawpuia faina leh thianghlimna kawnga hmalakna tur leh leilung leh boruak humhalh kawnga hmalakna tur te a kaihhnawih sorkar lam mipawimawhte leh tlawmngai pawl aiawh ten an sawiho a. Lawngtlaia veng tinah faina kawnga hmalatu tur Village level cleanliness committee (VLCC) din ni se, an ti.
Bawrhsap hova thukhawm chuan hman khat daih sarang hman chhunzawm a nih loh na turin a zuartute leh sumdawngte nen thawk hova hmalak dan ngaihtuah ni se, an ti a. PHED hnuaia bawlhhlawh sawngbawlna - solid waste management centre siam chungchangte, hman khat daih sarang khapna a hlawhtlin theihna tura hmalakna tur dang te, sorkar sikula faina inzirtirna kalpui te an rel bawk a ni.