MJA General Headquarters President C Lalrambuatsaiha chuan nimin khan Rotary Club of Aizawl-in an din champha vawi 30-na puala hun an hman chu hmanpuiin mi dangte tana malsawmna nih kawnga club inpekna ropui a tih thu a sawi.
Aijal Club-a hun hmanah thu sawiin C Lalrambuatsaiha hian, Rotary Club inpekna leh hmalaknate chu ropui a tih thu a sawi a. “Malsawmna kan dawnte hi mi dangte tan kan pe chhuak ve tur a ni a, mi dang tana inphal apiangte an hlim thin,” a ti.
Mihringte chu inmamawh tawn, a huhoa khawsa tura Pathianin a siam an nih thu a sawiin C Lalrambuatsaiha hian, “Mi dang tel loin kan khawsa thei lo a, mahni chauhin kan khawsa thei lo. Mahni chauh inngaihtuah thinte nun a hlim ngai lo a, mi dang tana inpe leh che nasa apiangte nun a hlim thin,” a ti a. Mi dangte tana malsawmna nih kawngah Mizote an thanharh tial tial thu te, Covid-19 boruakah Mizo mipui an luang chhuak thin a, chu chuan Mizote a tihthang mawi thu te, mi dangte tanpui chu a Pathian thu a, a Kristian a, a Mizo thute a sawi bawk
Khawvel pum huapa pawl lian berte zinga mi, Rotary Club hi June 13, 1992-ah din a ni a, Mizoram hmun hrang hrangah tanpuina tam tham tak an pe tawh a ni.