Mizoram Super League season 7 Finals chu Thawhlehni zan khan khelh tan a ni a. Game 1-ah Khatla TBL in champion lai Zarkawt BCA chu 87-65 in an sawp a. 1-0 in best of three series-ah an sang nghal.
R. Dengthuama Indoor Stadium a final inkhelah tan atangin Khatla TBL an che tha zawk nghal thuai a. Final kalkawng thui zawk leh khel tam zawk an ni a, anni aia inkhel lova lo awl rei tawh Zarkawt BCA aiin an hriam zawk.
Quarter hmasa pathum chhungin an khingpuite aiin point an score hnem zawk a ni mai lova, point 27 in an laka hma hruai lai an nei. Zarkawt BCA in remchang an neiin bucket an la thei lo mai a ni lova, TBL lamah ‘possession’ an pe leh thin.
TBL tan starting five - Vanlalthazuala, K. Lalthianghlima, Michael Liansanga, Vanlalrinchhana leh Levi Bradley Jr. ten point 10 aia tam theuh an score a. A bikin ‘mid-range’ nei tha Lalthianghlima a pawimawh a, Mizo player-te ah forward lian role la theite zinga a tha ber pawl a nihna lantirin point 25 a score bakah rebound vawi 14 a la a. Michael Liansanga leh Vanlalthazuala ten point 16 leh 19 an score.
Hetihlai hian quarter hnuhnung berah erawh inkhel dahtha tura hmahruaitu ni tura mawhphurhna la thei an neih loh a lang a. Zarkawt BCA in an hmahruaina an tihniam thui hman teuh.
Zarkawt tan Joseph Allen chuan point 20 leh rebound 16 a la a. Lalrina Renthlei chuan point 17 leh rebound 13 a nei ve bawk.