National Health Mission, Mizoram hnuaia thawkte an nawrh mek laiin Mizoram sorkara health department-in NHM Mission Director hnenah a hnuaia thawkte chu July 14 atanga dan pangngaia hna thawk tura hriattir turin lehkha a thawn a, hemi bawhzui hian controlling officer zawng zawngte hma la tura hriattir nghal an ni.
Health department-a Under Secretary Lianhmingthangi Hmar chuan nimin khan NHM Mission Director chu hriattirna pein, NHM hnuaia thawktute chu July 14 atanga dan pangngaia an hna chhunzawm theuh tura hriattir turin a ngen a, hna zawm lo an awm a nih chuan an chungah sorkarin dan angin hmalak a nih tur thu a tar lang.
Under Secretary lehkhaah hian NHM hnuaia thawkten ni thum chhung chawlh laa an nawrh chungchangah hian sorkarin theihtawp a chhuah a, an hlawh pawh April leh May pek tawh niin June leh a hnu lam atan an hlawh tur pawh chak taka ngaihtuahsak a ni tih tar langin, sorkar hotuten thil awm dan vawi tam tak an hrilhfiah tawh hnua tiam chin awm lova nawrh chhunzawm an tum chu sorkarin pawi a tiin, a hrethiam lo takzet tih a tar lang.
Health department-a under secretary ngenna bawhzui hian NHM, Mission Director chuan nimin tlai khan circular chhuahin, controlling officer zawng zawngte chu anmahni Chief Medical Officer concerned-te theuh kaltlanga NHM, Mizoram hnuaia hnathawk, an hna zawm lote chu NHM, Mission Director hnenah thlen thin tura hriattir turin a ngen.