Portugal-ah chuan an ram hmun 80% vel zetah kangmei chhuah mai hlauhthawnawm khawpin khua a lum niin national meteorological institute IPMA chuan a sawi.
Sorkar chuan ram pumah Zirtawpni thleng inralrinna dar a khawng a. Tual chhung, region leh ram pum huapa rikruma che chhuak thinte inralrinna niin police leh force dang pawh an inring a, kangthelhtu tam zawk rawihna tur sum ruahman a ni.
Thawhlehni khan kangmei chhuahna hmun 30-ah a thelhtu mi 849 an thawk chhuak a, heng zinga pathum chauh hi thunun thei.
Kartawpah khan kangmei liantham tak tak a chhuak a; mahse, a tam zawk chu thelh leh thunun tawh a ni hlawm a, ramngaw tha hectare sang tel erawh a kan ral rin a ni.
Khaw awm dan thlirin Ningani thleng hian boruak a la ziaawm hmel loh va, khua a lum zel a, thlia a thaw na hle bawk a. IPMA chuan hmun thenkhatah chuan 47°C laia lum a thleng dawn niin an sawi.
Khaw dur deuh khup khup erawh hmun thenkhatah a awm a; mahse, meteorologist-te chuan ruahte hi lei a thlen hmain a hu-ah a ral thei dawn niin an sawi.
Khualzinna lam pawh khaw lum hian a tibuai hle.
Khualzinte tlawh nasat tak, Lisbon bula Sintra, national palace, castle leh mi hip deuh hmun dangte chu sorkarin a khar.
Ningani atanga Inrinni thleng awh tur, Lisbon chhim lam, Sesimbra-a Meco tuipui kama rimawi kûtpui hman tur leh Europe-a motorbike rally lian ber, Algarve-a neih tur chu thulh a nih hmel riau bawk.