President Gotabaya Rajapaksa chuan Sri Lanka mipuiten an ram eibar dinhmun chhe lutuk avanga ram puma amah duh lohna an lantir mek laiin sipai thlawhna hmangin an ram a chhuahsan.
An ram air force chuan kum 73 mi hian a nupui leh vengtu pahnihte nen Maldives a pan tih a sawi.
A awm loh avangin Prime Minister Ranil Wickremesinghe chuan president nihna a chelh.
Wickremesinghe-a hian an ram khawthglang lam province-ah chuan emergency puangin curfew a puang bawk.
Rajapaksa-a tlanchhiat takah hian an rama an chhungkuain kum 20 vel zet ro an lo rel tawhna chu a tawp ta a ni.
Tar lan tawh thin angin Inrinnia mipui thinrimin a chenna in an luhchilh lai khan president hi a awm lo tawh a, Nilainia bâng tura intiam a ni.
Rajapaksa hian Maldives-a awm reng a tum lo va, ram dang pan leh a tum nia sawi a ni.
A unaupa, finance minister hlui, Basil Rajapaksa pawhin Sri Lanka hi chhuahsan tawhin United States a pan nia hriat a ni.
Sri Lankan-te chu Nilaini zing an thawhah an president tlanchhiat thu an hria a, an khawpui, Colombo-ah pungkhawmin tam tak phei chu an awmkhawmna pui ber, Galle Face Green-ah pawh an tam hle a. Mi thenkhat chuan thu na tak takin an sawi nghe nghe.
Thu sawitu tam zawk hian hnehna an chan thu an sawi a, sorkar an duh lohna aupuiin an hruaitute chuan an hruai dik lo niin an sawi hlawm.
Police-te chuan prime minister pisa bula pung khawmte chu mittui tlakna hmangin an phuh a; mahse, pisa leh sorkar building dangah pawh an lut lui tho.
A hma lawka Prime Minister Wickremesinghe-a’n TV-a thuchah a sawiah sipaite chu ‘boruak tihdaihna turin a tul ang apiang ti turin’ a ti tih a sawi.
“Kan danpui kan palzam thei lo va, tute emaw rorel duhna ang chi avangin engmah kan ti tur a ni lo va. Mipui rorelna tihtawp tumna hi kan titawp tur a ni,” a ti.
Hetih lai hian mipuite chuan an hruaitu lawk pahnihte chu an bân hma loh chuan duh lohna hi an lantir chhunzawm zel dawn tih an sawi thung.
Mi thenkhat chuan Rajapaksa tlanchhia chu an duh lo hle.
“Kan duh lo, amah kha kan duh. Kan pawisa hmuh kir kan duh a ni! Rajapaksa chhungkua hi tan in inhawngah, lo lam hna an thawh theihna hmunah khung kan duh,” tiin mi pakhat, GP Nimal chuan a sawi.
Kum 23 mi, university zirlai, Reshani Samarakoon chuan BBC hnenah president tlanchhia chu an ngaihdan a nih loh thu a sawi bawk.