Champhai leh a chhehvel fang mek ZPM Leader Lalduhoma’n Thawhlehni tuk leh nimin tuk khan Tuipui, Ruantlang leh Zotlangahte vantlang hmaah thu sawiin, “ZPM hun a inher chhuak mek niin a lang a, kan mi thiam rualte nen ruahmanna siamin Pathian leh mipuite zarah sorkarna siam turin kan inpeih tawh hle,” a ti.
Lalduhoma chuan, “Kan eizawn danahte hian bukna dik lo kan hmang nasa tawh em em a, dam rei ngaihna hi a awm lo,” a ti a. “Kristiante chu puktu ni lovin a puktirtu ni zawk turin Pathianin min hrilh a; mahse, tuna kan ram leiba dinhmun hi a hrechiang apiangin a rapthlakzia an hria,” tiin, ram siam tha tura beih chu mi tin mawh a nih thu leh pawn lam atanga ram vei mai lova a chhunga luhchilh a tul thu a sawi.
“Kan ram kan hnam damna tak tak chu Pathianah a awm a, leilung leh a chhunga awm zawng zawng hi Pathian siam leh a ta a ni a, a enkawltu turte pawh keini mihringte kan ni,” tiin Lalduhoma chuan Pathian thil tum chu khawvela a ram din a nih thu a sawi a. “Vanram kai kan tum a nih chuan leiah Pathian ram kan din phawt a ngai a ni,” a ti bawk.