Barcelona chuan an winger Ousmane Dembele chu an hnena contract a hman zawh hnuah contract thar an ziahpui leh thu an puang.
Player leh Catalan club hian hun rei tak chhung inbiakna an neih hnuah inremna an ziak a, kum 2024 thleng club-ah hian a cham dawn a ni. Dembele hian June thla khan contract a neihlai a hman zawh tawh avangin free agent a ni mek.
Barca head coach Xavi chu Dembele duhtu zing ami a ni a. France international hi a ruahmannaah a pawimawhzia club hotute a hriattir a, contract thar ziahpui turin a ngen a ni.
Dembele contract tharah hian a contract hman zawh tak aiin a hlawh tlem zawk dawn a, a hlawh hi 40% in an tihniam. A chetthat dan leh a khelh tam dan a zirin sum hmuh tur erawh a nei a, hengte hi a tlin vek a nih chuan kum khatah Euro maktaduai 10 vel a hlawh ang.
Spanish club hian Borussia Dortmund atangatangin Dembele hi Pound maktaduai 96.8 in an lalut a, a man hi Pound maktaduai 135.5 a pung chho thei a ni.
Spanish club-ah beisei nei sang takin lut mahse hliamin a tibuai nasa hle a. Kum nga chhungin club tan vawi 150 chauh a inkhel thei a, goal 32 khungin assist 34 a nei tawh.
Season liamta khan hliam avanga a buaina in a kiamsan ta deuh niin a lang a, match 32 khelin assist 13 leh goal hnih a khung a. Xavi-a’n a enkawl hnuah tlarhma a hlauhawm siamtu berah a hmang thin.
Tun nipuia amah ngaihven a lakluh tumtu zingah Chelsea an langsar a, Dortmund a enkawl tawhtu Thomas Tuchel chuan a duh. Anni bakah Paris Saint-Germain leh Bayern Munich an tel bawk.