Aizawl: Hachhek Constituency Development Committee (HCDC) Chairman Lalvansanga Pautu-in dan lova kuhva sumdawnnain Hachhek biala kuhva huan siama eizawngte tan nasa takin harsatna a thlen tih sawiin, thenawm state sorkar pawh dawra an harsatna chin felsak tura Mizoram sorkar an phut thu a sawi.
HCDC-in dan lova kuhvaa sumdawnnain Hachhek bial a nghawng dan sawihona nimina MZP Conference Hall, Aizawla an buatsaihah he thu hi HCDC chairman chuan a sawi a. “Hachhek bial nena inri, Assam lamah BJP MLA a awm a, ani hian kan kuhva tharte chu Burma lam atanga dan lova lo lutah ngai vekin kuhva leitute hnenah nasa takin donation a khawntir a, khawchhak kuhva tawlhtuten an phut zat apiang an pek theih laiin kan kuhva tharchhuah leitute erawh chuan harsatna an tawh phah miau avangin nasa takin kuhva hralh kawngah harsatna kan tawh phah a ni,” a ti.
An harsatna tawh chu thenawm state sorkar hnen thlenga sawisaka chin felsak turin Mizoram sorkar an phut tih HCDC chairman chuan a sawi a. “Hachhek bial chhung kawngpui hi dan lova kuhva tawlh nan hman kan phal lo,” a ti bawk.
Dan lova kuhvaa sumdawnnain Hachhek bial a nghawng dan sawihonaah hian Hachhek Bial Kuhva Chingtu Pawl (HBKCP) hruaitute pawh telin an bial chhung khaw tin welfare aiawh leh thalai thahnem tak an tel a. Kum 2022-24 chhunga HCDC hruaitu tura thlante an puang nghal.
Chairman Lalvansanga Pautu; Vice Chairman B. Lalnuntluanga; General Secretary C. Lalnuntluanga; Asst. General Secretary C. Lalnundika; Treasurer Rosangpuii leh Fin. Secretary Vanlalchaka te an ni.