Manchester United chuan hun rei tak chhunga an ngaihven tawh, tun season thar atana an team tichak tura an duh ber chu lakluh an hnaih a. Frenkie de Jong lalut turin Barcelona nen inremna an nei.
Club pahnihte inremnaah hian United hian Euro maktaduai 84 an pe dawn a. Erik ten Hag-a player duh hi mimal lama indawrna la neihpui tur an ni a, a contract turah an inrem phawt a la ngai.
De Jong hian United nena sawizawm a nih chhungin Camp Nou chhuahsan tumna a neih loh thu vantlangah a sawi ziah a, mahse heti chung hian United hian Old Trafford ah hruai luh theih an inbeisei a, a manager hlui hnuaia khelh leh a duh an ring.Chiang zawkin
United leh Barca inremnaah hian English club in Euro maktaduai 75 chu an pe tla phawt ang a, a bak zawng chu an inrem dan a zira la pek belh leh tur a ni ang.
Kum 25 mi hian club a cham a duh chhan hi Barcelona nena contract chungchang a buaina an neih vang a ni tel a. Spanish club hian player thar lakluh nan hralh an duh a, mahse a contract avangin United nen indawrna a kal sawt thei lo.
Tunkar khan United chief executive Richard Arnold leh director of football John Murtough ten Spain pana inbiakna an neih hnuah club pahnihten inremna nei turin hmalam an pan leh thei chauh a. Barca in Leeds United atanga Raphinha lakluhna an tihfel dawn avangin De Jong hralh an mamawhna a sang zual.A duh dawn em?
De Jong-a agent Ali Dursun hi Manchester United player thar Tyrell Malacia bakah Donny van de Beek leh Victor Lindelof te agent a ni a, ani kaltlang hian an indawr avangin United in beiseina an nei sang a, hei vang hian Dutch midfielder hi an umzui.Barcelona hian De Jong-a hlawh hi Covid 19 in a nghawng avanga an tih tlemna chu an la ba bawk a, a vaiin Euro maktaduai 19 vel an bat avangin hei hi an midfielder hian kalsan mai a tum lova, pek ngei a duh niin an sawi.
Barcelona sum dinhmun in a zir loh avangin a cham zel dawn a nih chuan nasa taka hlawh hniam zawka contract thar a ziah a ngai dawn niin thenkhat chuan an sawi bawk.Martinez pawh a hnai?
Red Devils hian Ajax atangin Argentine defender Lisandro Martinez chu Euro maktaduai 50 a lalut turin inremna an nei thuai dawn niin a lang bawk.Arsenal pawhin an ngaihven centre-back ball pet thiam hian Ajax chhuahsan a duh a, Dutch club hian United dilna hmasa lo hnawl tawh mahse amahin Premier League lam pan a duh avangin a club in United dawrna an ngaithla.
Argentina international hian a manager hlui Ten Hag a hnuaia khelh leh a duh a, Emirates Stadium aiin Old Trafford pan a thlang zawk.
Club pahnihte inremna zat hi a la fel lova, nimahsela Euro maktaduai 50 ah an inrem anga, a bak engemaw zah United hian an pek belh ang.
Feet 5 leh inches 9 a sang kum 24 mi Martinez hi defender palian ni lo mahse a ball pass thiamna avanga lar a ni a. Ten Hag-a khelh duhdan hre belsa a nih avangun Dutch coach in a duh.Left-back leh defensive midfielder anga buai miah lova khel thei bawk niin kum 2019 khan Ajax hian Argentina club Defensa y Justicia atangin an lalut a. Eredivisie-ah season thum a hman chhungin an tan vawi 120 a inkhel a, goal 6 a khung hman.