Sri Lankan President Gotabaya Rajapaksa chuan Maldives chhuahsanin Saudi airline thlawhna hmangin Singapore a pan leh nia hriat a ni.
President hian an rama eibar dinhmun chhe lutuk duh lova mipui an inhawr khawm mek laiin Nilaini khan Maldives panin an ram a chhuahsan.
Rajapaksa hi Singapore-ah hian a khawsa zui dawn nge, hmun dang pan turin a che chhuak leh dawn tih hriat a la ni lo.
Nilainia bâng tur khan a intiam a; mahse, Ningani thleng pawh khan tih dan phung pangngai angin bânna a la thehlut lo.
President hian hremna a hmachhawn huphurh vangin an ram a chhuahsan nia ngaih a ni a. A bana an rama a la awm zui a nih chuan sorkar tharin manin a chungah hremna an lek thei dawn niin a lang a ni.
President nihna chelh lailawktu, Ranil Wickremesinghe chuan Ningani pawh khan curfew a puang leh a. Chhun dar 12:00 atanga Zirtawpni zing dar 5:00 thleng atan a ti.
Wickremesinghe-a hi Thawhlehni zana sipai thlawhna hmanga Rajapaksa a tlanchhiat khan a ai lo awh lailawk turin a ti a; mahse, an ram mipuite chuan prime minister ngei pawh hi bâng se an duh em em lai a ni.
An eibar dinhmun a chhiat em avanga sorkar hotu liante laka mipuiin lungawi lohna leh anmahni duh lohna an lantirnaah hian Nilaini khan mi pakhat a thi a, mi 84-in hliam an tuar bawk a. Duh lohna hi an khawpui, Colombo-a hmun langsar apiangah lantir niin prime minister pisaah ngei pawh lantir a ni.
President berin a chhuahsan avangin Sri Lanka-a thuneitu ber hi a buaithlak rih hle.
Party danga politician-te chuan party tin telhna sorkar din tumin an indawr a, an la intifel thei lo va. An inrem a nih pawhin mipuiin an pawm dawn em a hriat chuang loh bawk.
An ram danah chuan president a bân chuan a thar awm leh hma chu prime minister-in a ai a awh tur a ni a; mahse, Rajapaksa hi a la bang si lo va, tuna a ai lo awhtu pawh hian eng ang chiahin nge president chetin a chet theih dan hriat thiam a har hle a ni.